ВМРО-ДПМНЕ: СДС за време на изборите ветуваа брда и долини за студентите, а сега кратат 155 милиони денари планирани за студентски домови

СДС откако дојде на власт ги заборави ветувањата кои им ги даваше на студентите. СДС по само 40 дена на власт со ребалансот на буџетот скрати цели 1.5 милијарди денари од парите наменети за образование. Стотици милиони скрати наменети само за високото образование, велат од ВМРО-ДПМНЕ.

-Стефан Богоев, Ивана Туфегџиќ, Зоран Заев, Рената Дескоска и другите од СДС за време на изборите ветуваа брда и долини за студентите, од типот на повисок студентски стандард, реновирање и изградба на студентски домови, изградба на студентски град кој ќе бил како хотел со 7 ѕвезди, додека пак деновиве сведоци сме како кратат над 155 милиони денари планирани за студентските домови.Да не заборавиме дека откако СДС е на власт, освен укинување, деструкција, блокада и кратење, друго ништо конкретно не видовме како проект или план за реализација што треба на студентите да им донесе подобро утре, истакна Јован Јаулески, член на ИК на УМС на ВМРО-ДПМНЕ.

Студентите и младите, додаде тој, можат да го видат вистинското лице на СДС.

-Студентите за жал се сведоци на луксузирања и набавка на скапи октоподи и морска храна која треба да ја јадат функционерите на СДС, а немаат пари за студентските домови и студентскиот стандард. Ова е огромен шамар за студентите, кои за жал уште веднаш на свој грб ги чувствуваат таканаречените реформи кои им ги носи новата влада на СДС. Со ова кратење на буџетот наменет за студентските домови, студентите нема да добијат подобри услови за живеење, подвлече Јаулевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.