Ви нудиме неколку начини како да ги отстраните мирисите од кујната што остануваат по приготвувањето вкусен ручек.
Кафето прави чуда
Во фрижидер, замрзнувач или на работната маса ставете сад со свежо мелено кафе и ќе ги неутрализира непријатните мириси. Ако пиете турско кафе, по слаткиот ручек, сварете си кафе – ем ќе ги неутрализирате мирисите во кујната ем ќе се отпуштите со кафето.
И јагленот е решение
Поради хемиските својства јагленот може да се користи за впивање на мирисите. Набавете природен јаглен без адитиви и можете да го користите во фрижидерот или за впивање на мирис на влага. Парче јаглен ставете во чорап и ставете те го некаде далеку од очите. Ќе си ја заврши работата.
Содабикарбона како освежувач на воздухот
Семоќната содабикарбона дејствува како меленото кафе. Ставете ја во сад на работната маса во кујната и ќе ги впие мирисите. А ако зовриете содабикарбона со вода, ќе добиете еколошки освежувач на воздухот.
Чистете зад себе
Како што ќе употребите некој сад, заплакнете го. Не дозволувајте да ви се натрупаат немиени садови додека готвите. Водата ќе ги измие парчињата храна, а со тоа ќе се намали и мирисот што се шири од немиените садови. Ако имате машина за миење садови, пред да почнете да готвите, испразнете ја ако во неа имало чисти садови. Подгответе ја да ја полните како што ќе завршувате да користите некој сад. Така, на крајот ќе добиете чиста кујна, полна машина и помалку мириси од кои ќе треба дополнително да се ослободувате. Ручекот во рерна, машината вклучена.
Исперете ги крпите
Крпите, завесите и другите ткаенини во домот имаат моќ да впиваат мириси. Затоа, откако ќе завршите со готвење и ќе искористите некој од магичните начини за отстранување мириси, исперете ги перничињата, завесите, крпите. Ем ќе се ослободат од мирисите ем ќе го рашират свежиот мирис од омекнувачот.
Лукот и кромидот победете ги со цимет и со чоколада
Ако не можете да го отстраните мирисот од кромид, месо или од лук, надмудрете го. Испечете чоколадни колачи. Исто така, можете да ставите неколку стапчиња цимет во вода и да ги вриете околу половина час. Нивниот пријатен мирис ќе ја исполни кујната.
Лимон или оцет, лавров лист, ванила
Лимонот варете го исто како и циметот. Исечкана кора од лимон или кора од други цитруси, лавров лист, ванила, рузмарин и други билки можат да направат чуда во борбата со мирисите.
Пред и по готвењето користете јаболков или алкохолен оцет. Поставете садови со оцет на неколку места во кујната и препуштете му се на готвењето. Оставете го оцетот на стратегиски места неколку часа откако ќе завршите со готвење.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.