Повеќе од 50 баскер-изведувачи од светот, акробати, жонглери, танчари, магионичари, кловнови и музичари се дел од програмата на 12. издание на фестивалот „Баскерфест“ што од утре до 25 јуни ќе се одржува во Скопје.
Градоначалникот на Град Скопје Коце Трајановски на денешната прес-конференција ги повика сите граѓаните да дојдат и да уживаат во многу различни содржини на фестивалот.
– Покрај улични артисти и жива музика, посетителите ќе може да уживаат во претстави, пантомима перформанси, улични танчари, креативни работилници, ликовни изложби, базар на ракотворби и работилници со артисти. Ќе има можност за различни возрасни категории и вкусови да можат да уживаат во сè што ќе понуди годинашниот „Баскерфест“ – изјави Трајановски.
Посочи дека Скопје е прв град на Балканот што го организира овој фестивал, почнувајќи од 2006 година.
Според Сандра Темова, еден од организаторите, најголемата убавина на фестивалот е што е наменет за посетители и граѓани од сите возрасти, бидејќи нуди забава за сите.
– Имаме детска работилница што почнува од 18.30 часот. Настапите на артистите почнуваат од 19.00 часот и траат се до 23.00 часот, додека музичката програма почнува од 22.00 и трае до 1.00 часот – изјави Темова.
Посочи дека ново годинава е што за првпат ќе има шоу со балони, како и интересен спектакла на група музичари со ударни инструменти од Романија и повеќе циркуски настапи.
Манифестацијата се одржува на три локации на плоштадот „Македонија“. За организирањето на годинашниот фестивал градот Скопје издвојува 1.200.000 денари.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
