МЗТ Скопје Аеродром стигна до втората победа во финалната серија од плејофот против Карпош Соколи, и се наоѓа на еден триумф до одбрана на шампионскиот трофеј. „Металците“ имаат водство од 2-1 во победи, откако вечерва во „Јане Сандански“ славеа со 86-80. На моменти имаа и голема предност (70-54), но мораа да се испотат на крајот за да стигнат до вториот триумф.
Соколи подобро го започна натпреварот кога станува збор за шутот за три поени, па по двете тројки на Мавра и една на Соколов во првите пет минути од средбата значеа водство на гостите од 11-7. МЗТ до поени стигнуваше влегувајќи во рекетот, Карпош продолжи со шутот од дистанца и веќе реализираа четири тројки во првиот дел, со помош на Соколов и овој пат Чомагиќ. На две минути пред крајот Трајковски ја заработи третата лична грешка, а потоа следуваше серија на домаќинот од 7-0 и го доведоа резултатот на само еден поен негатива. До крајот на првата четвртина избраниците на Николиќ постигнаа само еден кош, додека МЗТ почна да ја гради предноста преку Темс и Дреновац (21-16).
Вторите десет минути започнаа со реализација на екипата од Карпош, а кога Назор ја смени одбраната и домаќинот започна зонски да се брани, Соколите на постигнаа кош цели шест минути. МЗТ направи серија од 14-0 и стигна до највисоката предност на мечот (37-22). Мавра и Чомагиќ со нови тројки на три минути до крајот на полувремето ја прекинаа серијата на МЗТ (39-31), што ги мотивираше гостите да се обидат да се вратат резултатски. На паузата МЗТ замина со предност од 10 поени разлика (44-34).
Третиот период резултатски го отвори МЗТ по неуспешниот напад на Соколи, а при резултат од 47-37 следуваше триминутен пост и на двете екипи, при што промашија неколку последователни напади. Во последните пет минути од третата четвртина Карпош успеа да ја донесе разликата до едноцифрена бројка, најзаслужен за тоа беше Пери кој влезе во својот ритам, така што МЗТ имаше минимална предност од четири разлика, односно 54-50. До крајот на предпоследниот периот Клоф и Темс ги зедоа работите во свои раце и МЗТ повторно се одвои од противникот, па четвртината заврши со резултат од 61-54.
МЗТ во завршните десет минути направи нова серија од 7-0 и повторно поведе со двоцифрена разлика. Соколи не знаеше за реазлизација цели три и пол минути, па водството на „металците“ се зголеми (70-54). Тимот на Карпош Соколи, сепак, ја намали негативата, и на една минута до крајот стигна до три поени негатива, а одговорот дојде од Дреновац. Клоф реализира слободни фрлања, но Мавра погоди тројка (83-80).
Сепак, МЗТ заслужено ја славеше втората победа во финалната серија. Пред крајот, гостинскиот тренер Николиќ се обиде да се расправа и со домашната публика, очигледно нервозен поради поразот.
Најефикасни во таборот на МЗТ Скопје Аеродром беа Темс со 22 поени, Клоф со 21 и Дреновац со 20 поени. За Карпош Соколи најмногу поени реализира Пери (24), Мавра заврши со 20.
Четвртиот натпревар од финалната серија се игра за два дена во „Борис Трајковски“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
