Жо Вилфрид Цонга ја израдува публиката на Ролан Гарос со елиминација на најтрофејниот тенисер на гранслем турнирите, Роже Федерер во три сета. Со 7-5, 6-3, 6-3 го исфрли од игра 17-кратниот шампион на најценетите светски турнири и ќе игра во полуфиналето против Давид Ферер. Шпанецот беше подобар од својот сонародник Томи Робредо, и го порази на уверлив начин со 6-2, 6-1, 6-1. И двајцата полуфиналисти досега немаат загубено ниту еден сет.
Роже Федерер се помалку наликува на асот што со години важеше за најдобар светски тенисер. Швајцарецот е без освоен трофеј во последните неколку месеци, а слабата форма ја потврди и со денешниот убедлив пораз од Жо Вилфред Цонга во четвртфиналето од Ролан Гарос. Швајцарскиот тенисер се најде во полесниот дел од „костурот“, избегнувајќи ги Надал и Ѓоковиќ се до финалето, но се е попусто кога тој не може да одигра во својот препознатлив ритам и да стигне до битка за трофејот.
Цонга знаеше како да го искористи тоа, одигра фантастичен меч и апсолутно заслужено стигна до убедлива победа.
Таму миленикот на домашната публика за противник ќе го има Давид Ферер, кој рутински ја одработе својата задача против Томи Робредо,препушѕајќи му само 4 игри. Робредо во последните три рунди правеше фантастичен пресврт, враќајќи се од негатива од 0-2 за на крајот да слави со 3-2 во сетови, но искусниот Шпанецот овојпат делуваше преморено и немаше никакви шанси да повтори сличен подвиг против расположениот Ферер.
Во женска конкуренција Серена Вилијамс продолжи да доминира на тениските терени, иако по долго време загуби сет. Светлана Кузнецова и беше достојна противничка, но сепак Американката оди во полуфиналето со победа од 6-1, 3-6, 6-3. Противничка за пласман во финалето ќе и биде Сара Ерани, која во два сета со 6-4, 7-6 ја елиминира Агњешка Радванска.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
