Првата внука на јапонскиот цар Акихито, принцезата Мако (25) се вери за својот поранешен колега од факултет, Кеј Комуро, кој нема благородничко потекло.
Веридбата официјално ќе биде објавена кога ќе бидат завршени сите неопходни подготовки за тоа. Ова на прес-конференција го соопшти претставник на Царскиот дворец, кој меѓу другото, изрази жалење поради предвременото протекување на оваа информација.
Принцезата се запознала со својот избраник пред пет години, а тој по само една година ја запросил. Нејзините родители – принцот Акисино и принцезата Кико ја одобриле одлуката на ќерка си, која по свадбата ќе ја загуби благородничката титула и ќе стане „обична Јапонка”.
Кеј Комуро моментно живее во Јокохама со неговата мајка и дедо, а работи како правник.
Принцезата Мако е највозрасната ќерка од трите деца на принцот Акисино, кој е втор во редот за наследство на царот, по неговиот постар брат, принцот Нарухито.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
