Димитриев: Да надвладее разумот, да се запази достоинството на народот

Во моменти кога имаме силна политичка поларизација да надвладее разумот, да се запази достоинството во постапките и комуникацијата меѓу себе. Република Македонија во историјата преживеала многу премрежја, ќе го преживее и ова и ќе излезе посилна, порача премиерот Емил Димитриев, кој денеска присуствуваше на велигденската литургија во централниот храм на Брегалничката епархија „Свети Никола“ во Штип.

– Доброволната жртва на Исус нѐ потсетува дека треба да ги запазуваме вредностите, коишто со векови го јакнеле единството меѓу македонскиот народ, а граделе соживот и толеранција со останатите народи. Ова е поука за политичарите во моменти кога имаме силна политичка поларизација да надвладее разумот, да се запази достоинството во постапките и комуникацијата меѓу себе. Република Македонија во историјата преживеала многу премрежја, ќе го преживее и ова и од ова ќе излезе посилна – рече Димитриев.

Митрополитот на Брегалничката епархија г. Иларион истакна дека денеска е радосен ден, а македонскиот православен народ денеска го слави Велигден научен од проповедот на Светиот апостол Павле, проповедено и  во Филипи кај првата жена христијанка Лидија.

– Посакуваме светлоста Христова да ги просветли и осветли сите луѓе во светот, да завладее мир и љубов, сплотување и соединување, а исто така посакуваме и во татковината наша Христовата светлина да ги просветли сите луѓе, да ги избави од мракот и како што Христос со воскреснието ги посрами и ги порази непријателите негови, така и нашите непријатели кои ја мразат татковината и верата православна да ги посрами со своето воскресение. Нам да ни даде сила и трпение, љубов да истраеме – рече г. Иларион.

Тој упати порака и до македонските политичари и оние кои ја раководат државата за ум и разум, љубов и единство за да може, вели, сите граѓани да ја чуваат татковината и древната наша црква Света Охридска архипископија која годинава одбележува 50 години од возобновена во лицето на Македонската православна црква.

На литургијата присуствуваа и градоначалникот на општина Штип, Илчо Захариев, пратеници во Парламентот и голем број верници.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.