Годинашен добитник на меѓународната награда „Златен прстен“ за книжевен творечки опус е писателот Виктор Б. Шеќеровски од Белград. Тој е автор на повеќе поетски книги и избори, како и на голем број истражувачки книжевни и историографски текстови. Директор е на Новинско–издавачкиот центар и главен и одговорен уредник на списанијата „Македонска виделина“, „Видело“ и „Ѕуница“, кои ги објавува Националниот совет на Македонците во Панчево (Србија). Неговата поетска книга „Отмени празнини“ за која ја доби и наградата „Иселеничка грамота“ ја објави Издавачката куќа „Феникс“ од Скопје, која годинава ќе публикува и нов поетски избор од Виктор Б. Шеќеровски.
Традиционалната меѓународна награда „Златен прстен“ ја доделуваат Издавачката куќа „Феникс“ и Фондацијата за културна и научна афирмација и презентација „Македонија презент“ од Скопје, а одлуката за наградата ја донесоа: проф.д–р Христо Петрески, проф.д–р Васил Тоциновски и м–р Трајче Кацаров.
Наградата ќе биде врачена на Меѓународниот саем на книгата, кој се одржува од 4 до 10 април 2017 година во Скопје.
Инаку, досегашни добитници на наградата „Златен прстен“ се: Милан Ѓурчинов, Ферид Мухиќ, Светлана Христова Јоциќ, Васил Тоциновски, Петре Бакевски, Веле Смилевски, Тодор Чаловски, Ристо Василевски,Јордан Плевнеш, Раде Силјан, Санде Стојчевски (Македонија), Фиона Самсон (Англија), Петар Опачиќ,Борислав Павловски (Хрватска), Бања Нацуиши (Јапонија), Владислав Бајац, Момо Капор, Радомир Андриќ, Ева Рас, Душица Илин, Ненад Груичиќ, Зорица Арсиќ Мандариќ (Србија), Сергеј и Тетјана Ѕуба (Украина), Аднан Озер (Турција), Радомир Улјаревиќ (Црна Гора) и Јованка Стојчиновиќ Николиќ (Босна и Херцеговина).
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
