Вчера вечер, пред бројни љубители на литературата и посетители на Културно-информативниот Центар на Република Македонија во Софија, беа промовирани шест романи на бугарски јазик, од помладата генерација македонски писатели.
Бугарските книгоиздателства “Персеј” и “Изида” во изминативе 2 години издадоа десетина книги на македонски автори, а на оваа промоција беа претставени романите “Вишновата хроника” од Фросина Пармаковска, “Куфер за тројца”од Живко Грозданоски, “Бездомникот со златен часовник” од Вера Калин, “Црвено и бело” од Михајло Свидерски, “Безимената месечева соната” од Давор Стојановски и “Очи со боја на чевли” од Петар Андоновски.
Овие дела веќе предизвикуваат интерес кај бугарската читателска публика, а во Република Македонија беа финалисти на наградата “Роман на годината”.
Оваа генерација македонски писатели, предизвикува исклучителен интерес и кај стручната јавност, но најмногу кај читателската публика. Наградувани се со бројни домашни, но веќе и со меѓународни признанија.
За авторите и нивните дела зборуваа Васко Шутаров, од име на домаќинот и иницијатор на овој проект, Културно-информативниот Центар на Р. Македонија, Пламен Тотев од име на книгоиздателствата “Персеј” и “Изида” и Тања Попова, од име на преведувачите на овие дела.
Интересот за конкурсот на Министерството за култура за поттикнување на преведуваштвото на македонски автори во странство, имаше исклучителни резултати во книгоиздателството во Бугарија. Изминатите неколку години, преведени се и издадени преку 25 дела, од сите литературни жанрови и од сите писателски генерации. КИЦ на Р. Македонија веќе ги промовираше стихозбирките “Ѕвезден корен” од академик Анте Поповски и антологијата на современата македонска поезија “Портал на сонцето”. До крајот на годината ќе бидат промовирани дела од академиците Влада Урошевиќ и Луан Старова, како и неодамна излезениот роман на Јулијана Величковска “Годишни времиња”.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
