– Граѓани на Македонска Каменица поддржувачи на граѓанската иницијатива „За заедничка Македонија“ попладнево повторно излегоа на протестен марш кој се одвиваше по улиците во центарот на градот во мирна атмосфера.
На протестот пред присутните се обрати жител на селото Саса, Новица Стојановски, кој порача дека никој од надвор нема право да одлучува за македонската држава, нејзиниот устав и нејзината унитарност.
– Браќа и сестри доведени сме во прашање да се бориме за здив, бидејќи ни се одзема воздухот за дишење. Понижени сме од политиките на Брисел и Вашингтон кои очигледно работат на целосна наша идентитетска ликвидација. Новиот тип на геноцид што избраа го тестираат во Македонија. Затоа како моќна алатка ги користат нашите алчни соседи. Не застрашуваат со најрзалични средства, политички и економски блокади, но и со воен тероризам како оној од 2001-вата. Но, ние сме храбри и вистината и правдата се на наша страна , бидејќи имаме единствена цел да ја сочуваме Македонија, рече Стојановски.
Попладнево по осми пат протестен марш „За заедничка Македонија“ се одржа и во Делчево. Протестниот марш започна од градскиот парк и со познатата црвено-жолта симболика и транспаренти „За заедничка Македонија“, се одвиваше во мирна атмосфера низ улиците во центарот на Делчево. Граѓаните поддржувачи на иницијативата порачаа дека протестите ќе траат се додека не се добие гаранција од политичките фактори дека нема да се прифаќаат платформи од други држави и ќе се гарантира уставниот поредок на државата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
