Топло-ладно за Барселона, по историската победа над ПСЖ, денеска пораз од Ла Коруња (видео)

Само пет дена по чудесниот камбек против ПСЖ, фудбалерите на Барселона се посрамотија во рамките од Примера дивизија, губејќи на гостувањето против Ла Коруња со 2-1.

Иако против себе имаа тим од долниот дел на табелата, каталонците целосно потфрлија, воопшто не наликуваа на тимот што во средата го демолираше ПСЖ и сосема заслужено со наведнати глави го напуштија теренот на „Риазор“. Ла Коруња прва поведе во финишот од првото полувреме по несмасните интервенции на Маскерано и на Тер Штеген.

Луис Енрике ја утна работата со тактиката, на стартот од вториот дел ги уфрли Иниеста и Ракитиќ наместо Туран и Гомеш, па веднаш следеше израмнување преку Луис Суарез. Сепак, во моментите кога се очекуваше целосен атак на гостите во обид за победа, Ла Коруња постигна уште еден гол преку Бергантинос, кој скокна над Жорди Алба и го совлада Тер Штеген за фантастична победа на тимот од Галиција над каталонскиот гигант.

Deportivo La Coruna vs Barcelona 2-1 All Goals… by gashiylli223

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.