Универзитетските професори Дејвид Ларсен и Џејмс Вудс од универзитетот во Милвоки, Висконсин во САД денеска пред студентите на Факултетот за медицински науки при универзитетот „Гоце Делчев“- Штип одржаа предавање на тема пластична хирургија.
Тие велаат дека во Македонија се на покана на министерот за здравство, Никола Тодоров заради усогласување на образовниот процес на медицинските студии во Македонија и САД. Покрај интензивни средби со наши лекари специјалисти, професорите имаат постојано предавање пред студентите од медицинските факултети, на кој се презентираат знаења од различни области.
– Пред студентите од медицинскиот факултет при УГД ќе зборувам за основните во пластичната хирургија која е моја специјалност, рече Ларсен.
Лекарот Џејмс Вудс, исто така професор на универзитетот во Милвоки во САД, веќе трета година по ред доаѓа во Македонија и вели дека овие посети се добра можност за размена на искуства и добри пракси. Особено е задоволен со квалитетот на знаење што го покажуваат македонските студенти.
– Иако постојат големи разлики во студиските програми и со оглед на фактот дека се работи со лимитирани ресурси, сепак сум импресиониран со нивните способности да апсорбираат нови знаења, рече Вудс.
Докторите од САД се сретнаа и со раководните лица во штипската Клиничка болница, а имаат соработка и со лекарите од оваа регионална болница.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
