Наместо осмомартовска прослава, членките на ОК на Унија на жени од ВМРО-ДПМНЕ Струмица, донираа перики за членките на Здружението „Борка“.
Според претседателката Ели Панова, ова е мал гест на внимание за болните од рак, кои поминуваат тешка фаза во животот.
– Во оваа акција учестуваа голем број жени, а не само наши членки. Сакам да им се заблагодарам на сите кои дадоа свој придонес за реализација на оваа акција, која е особно важна за оваа категорија жени. Сакаме да им порачаме на сите дека хуманоста треба да биде дел од нашето секојдневие, затоа што секое нешто кое со малку љубов и внимание го правиме ја создава вистинската среќа – рече Панова.
Раководителката на Здружението „Борка“ од Струмица, Кети Филчева изрази голема благодарност за донацијата, нагласувајќи дека помошта ќе биде од корист за жените болни од рак.
– Благодарност на жените од ВМРО-ДПМНЕ што се откажаа од прославата на 8 март и собраа средства да ги купат овие седум перики. Особено ни е важно што оваа донација е наменета за жени и доаѓа од жени. Ние, како „Борка“ освен со едукација и превенција, имаме и кампања за донирање бесплатни перики на жени кои минуваат фаза на хемотерапија, а социјалната положба не им дозволува да купат сами. Тргнувајќи од фактот колку косата и значи на жената, ваквите донации ни овозможуваат да им помогнеме на поголем број дами – рече Филчева.
Таа нагласи дека жените оперирани од рак на дојка, од годинава може да земаат бесплатна протеза покриена од ФЗОМ, еднаш годишно, а не како што било случај досега еднаш на две години.
– Имаме одлична соработка со Алијансата и со Фондот за здравствено осигурување. За користење протези жените треба да земат потрвда од матичен лекар и да одат во специјализирана продавница каде што може да ја набават – рече Филчева.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
