Товарниот железнички сообраќај во Македонија треба да профункционира попладне во 16 часот, а од утре и патничкиот, со што се прекинува двонеделниот протест на вработените. Тоа го изјави претставникот на машинскиот персонал во Македонски железници Транспорт Душко Чакароски по денешната средба со в.д директорот на МЖ Транспорт Игор Коруноски.
Според Чакаровски, машиновозачите се задоволни од постигнатиот договор и денеска линеарно ќе им бидат исплатени по 10.000 денари од вториот дел од платата за јануари. Првиот дел од платата работниците го добија вчера. Договорено е платата за февруари да биде исплатена до крајот на март за да не бидеме доведени во ситуација на 5 април повторно да го блокираме железничкиот сообрачај, изјави Чакаровски.
Претходно, денеска претпладне, одлука да се вратат на работа донесоа и вработените од работилницата за одржување во МЖ Транспорт. Како што изјави Ѓоко Илиески од иницијативниот одбор за протестот, со Коруноски договориле втората половина од платата јануари да ја добијат во текот на следната недела, а платата за февруари да се исплати целосно до крајот на овој месец.
Поради протестот во железницата, што трае повеќе од две недели, а со кој се бараше целосна исплата на јануарската плата, целосно е блокиран и патничкиот и товарниот железнички сообраќај. Во тек на протестот оставка даде генералниот директор на МЖ Транспорт Никола Костов, а за в.д директор беше поставен Игор Коруноски.
Покрај раководството на МЖ Транспорт апели да прекине протестот поради штетите и за железницата и за стопанството упатија Владата, Министерството за транспорт и врски, како и компаниите коминтенти од коишто дел информираа дека ќе бидат доведени во ситуација да го прекинат производството затоа што преку железницата ја вршат главната набавка на суровините.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
