Тетекс го освои купот по подобро изведување на пеналите

По вторпат во клупската историја Тетекс е освојувач на националниот фудбалски куп, а херој кај текстилците беше голманот Манчевски во повторениот дуел со Шкендија. Тој го одбрани ударот на Бериша во седмата серија и е најзаслужен за успехот на тимот од Тетово.

Во регуларниот дел од натпреварот немаше победник, а исходот по 90 минути беше 1-1. Прв погоди Музафер Ејупи во 17. минута по одличната асистенција на Положани. Шкендија поведе, но и рано остана со играч помалку по исклучувањето на голманот Велии. Тој стартуваше недозволено надвор од шеснаесетникот, играше со рака и доби црвен картон. Играчката предност на теренот, Тетекс ја материјализираше во 69. минута. Младиот Мицевски извонредно погоди за 1-1 од околу 18 метри. До крајот немаше голови, резултатот 1-1, остана и по продолженијата од 2 по 15 минути, па пеналите одлучуваа. Во првите пет серии, на двете страни имаше само по една утка, а седмата серија го одлучи победникот.

Најпрво Исени погоди за Тетекс, а потоа Манчевски го одбрани ударот на Бериша, за големо славје на Тетекс. Тие по вторпат се радуваат на пехарот во купот, а си обезбедија и настап во квалификациите за Лига Европа на УЕФА. Шкендија повторно остана без трофејот што им недостасува во колекцијата.

Мечот, вечерва се играше без публика, откако во средата беше прекинат поради инциденти на трибините.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.