Мајами ја продолжува победничката низа, Кари беше неверојатен во победата над Шарлот (видео)

Мајами долго време се мачеше на почетокот од сезонава, што означи и старт на „новата ера“ во клубот по заминувањето на Двејн Вејд, но „жешките“ сега изгледаат како навистина сериозен тим. Впрочем, синоќешниот натпревар со Атланта (116-93) беше вкупно деветта победа во низа за тимот од Флорида, кој е незапирлив во последните дваесетина дена на кошаркарските терени низ САД. Словенецот Горан Драгиќ одигра уште еден одличен натпревар постигнувајќи 27 поени, Дион Вејтерс додаде 20, а Вајтсајд оствари нов дабл-дабл, 18 поени и 18 скока, за продолжување на најдолгата активна победничка серија во НБА во моментов.

– Немаме објаснување. Едноставно, излегуваме на теренот и играме подобро отколку претходно. Не размислуваме за минатото, само сакаме да продолжиме во овој ритам и во иднина – изјави Драгиќ.

Голден стејт го совлада Шарлот со 126-111, меч во кој извонредна игра покажа Стеф Кари. Фантастичниот шутер погоди осум тројки од десет обиди само во првото полувреме, за на крајот мечот да го заврши со 11 тројки и вкупно 39 поени за три четвртини, откако последните дванаесет минути ги проследи од клупата а резерви.

Кливленд ја победи Минесота со 125-97, а Леброн Џејмс за малку не стигна до „трипл-дабл“ ефект, бидејќи натпреварот гоо заврши со 27 поени, 8 скока и 12 асистенции.

Резултати НБА:

Кливленд – Минесота 125-97, Мајами – Атланта 116-93, Детроит – Њу Орлеанс 118-98, Денвер – Мемфис 99-119, Далас – Филаделфија 113-95, Бостон – Торонто 109-104, Орландо – Индијана 88-98, Феникс – ЛА клиперс 114-124, Јута – Милвоки 104-88, Оклахома – Чикаго 100-128, Голден стејт – Шарлот 126-111.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.