Стоп за шампионот во Далас, Ајзеа Томас беше неверојатен во победата на Бостон (видео)

Далас маверикс потврди дека се наоѓа во одлична форма откако само 24 часа по големата победа над Сан Антонио овој тим славеше и во пресметката со шампионот Кливленд, триумфирајќи со 104-97. Четири од петте стартери на Далас (исклучок беше Новицки со осум поени) имаа двоцифрен ефект, најефикасен беше Харисон Барнс со 24 поени и 11 скокови, а најпријатно изненадување беше бекот Јоги Ферел, кој до пред неколку дена настапуваше во развојната Д лига, за синоќа да му даде 19 поени на актуелниот шампион. Кливленд на овој натпревар настапи без Кевин Лав, во чие отсуство Леброн Џејмс постигна 23, а Ирвинг 18 поени, но двете најголеми ѕвезди на шампионот имаа очајна шутерска вечер од далечина (вкупно 2/14).

Бостон во интересен натпревар славеше над Детроит со 113-109, пред се благодарение на Ајзеа Томас и неговото шоу во последната четвртина. Плејмејкерот на селтикси го заврши мечот со 41 поен, од кои дури 24 ги постигна во четвртиот период од средбата, носејќи го Бостон до импресивен скор од 30-18, само два меча зад Кливленд во трката за првото место во Источната конференција.

НБА резултати:

Филаделфија – Сакраменто 122-119, Мајами – Бруклин 104-96, Бостон – Детроит 113-109, Минесота – Орландо 111-105 (по прод.), Далас – Кливленд 104-97, Феникс – Мемфис 96-115.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.