Капитенот на нашата репрезентација, Кире Лазаров предизвикува огромно внимание во светските медиуми поради извонредните игри по првите два натпревари. На нив Лазаров има постигнато 22 гола и овој почеток е подобар и од Светското првенство во Хрватска, кога нашиот „бобардер“ постигна рекорд на светските шампионати.
На првиот натпревар со репрезентацијата на Тунис, Лазаров запиша 12 гола од 16 обиди (75%), додека против Ангола вчера упати 12 удари, а постигна 10 гола (83%). На двата натпревари нашиот капитен ги реализира сите 10 удари од седум метри. Ако се собере статистиката од двата натпревари Лазаров има фантастична реализација од 79% (22 од 28), а одигра нешто преку 60 минути на теренот, кога ќе се собере минутажата од двата натпревари.
Кирил Лазаров е прв стрелец со 22 гола, пред Бугамни и Генсхајмер со по 13 погодоци. Германецот има само еден натпревар, на кој исто така имаше извонреден процент на реализација од 87%. Со овие 22 гола Лазаров ја мина границата од преку 200 гола на завршните турнири на Светските првенства и е единствен во поновата историја кој постигнувал голови на пет Мундијали: Египет, Хрватска, Шпанија, Катар и Франција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
