Лина на чекор до главниот турнир на Австралија опен, за неполн час ја збриша Унгарката Галфи (видео)

Најдобрата македонска тенисерка Лина Ѓорческа се наоѓа на чекор до влез во главната ждрепка на Австралија опен откако и во вториот меч од квалификациите во Мелбурн демонстрираше во каква форма се наоѓа.

Ѓорческа си поигра со Унгарката Далма Галфи, 160. тенисерка на светот, и ја совлада експресно,речиси за еден час игра со 2-0 во сетови (6-1, 6-1). Со втората победа во Мелбурн, тетовката уште еднаш покажа дека местото ѝ е меѓу најдобрите тенисерки на гранслем-турнирите.

Во првиот сет Ѓорческа за само 26 минути ја декласира некогашната јуниорска победничка на УС Опен, Галфи, одземајќи ѝ го сервисот двапати. Со доминантен тенис нашата хероина ја зголеми самодовербата и во вториот сет продолжи да игра како по ноти.

При 1-1 направи брејк и како искусна тенисерка го приведе мечот кон крај, добивајќи го вториот сет со 6-1. Лина сервираше одлично, подели и пет аса и не се потроши премногу за следниот клучен меч. Во третото и последно коло од квалификациите противник на Ѓорческа ќе биде поуспешната од швајцарскиот дуел Вогел – Садиковиќ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.