Со овации и скандирање на неговото име од преполната сала, Перо Антиќ синоќа беше пречекан од навивачите на домаќинот Олимпијакос пред натпреварот со неговиот сегашен клуб Фенербахче, а кусо пред почетокот на мечот претседателите на атинскиот клуб му доделија признание за заслугите во периодот 2011-2013.
Управата на Олимпијакос реши да ги почести поранешните играчи Антиќ и Слукас, а сега членови на Фенербахче. И додека навивачите од популарната Gate 7 во салата „Мир и пријателство“ го исвиркаа Костас Слукас, поради начинот на кој си замина од Атина, на македонскиот кошаркар со овации му заблагодарија за придонесот во тимот и освоените 2 европски титули.
Перо Антиќ пак, по завршувањето на натпреварот, за грчката телевизија Нова освен што им се заблагодари на сите, ја остави и отворена можноста повторно да се врати во Атина.
– Никогаш не вели никогаш, кога ќе ми заврши договорот со Фебербахче ќе размислам, порача Антиќ.
– Знаат дека ги сакам многу и дека се во моето срце, и тимот и Gate 7 (навивачите). Имавме одлични моменти порано. Чудно е чувството да си тука и да играш против Олимпијакос, за прв пат во мојата кариера. Но, е одлично искуство, емотивна вечер и им благодарам за она што го сторија за мене, за почеста, рече македонскиот кошаркар по натпреварот.
Со 71 -62, поранешниот тим на Перо Антиќ на домашен терен славеше против Фенербахче на вчерашниот натпревар во преполната сала во Атина.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
