„Боксинг деј“ донесе нови возбудувања, пораз на шампионот, рутински победи на фаворитите (видео)

Актуелниот шампион Лестер беше поразен денеска со 0-2 од Евертон, во дуелот од 18-то коло во Премиер лигата. Првата можност за погодок ја имаше Амартеј, кој биеше од далечина, но топката помина покрај стативата на „карамелите“.

До крајот на полувремето и двете екипи се обидуваа да се заканат кон противничкиот гол, но на паузата се замина со почетниот резултат. Веќе на почетокот на второто полувреме, Евертон дојде до водство преку погодокот на Миралас. Тој прими одлична топка во шеснаесетникот и биеше неодбранливо во левиот агол на Каспер Шмајхел. Улоа имаше добра шанса за погодок во 66-та минута, а Лукаку во последните минути погоди за заверување на победата на Евертон.

Лидерот во Премиер лигата, Челзи ја продолжи серијата на победи и во 18. коло од Премиер лигата на „Стемфорд бриџ“ го совлада Борнмут со 3-0, иако настапи без Канте и Диего Коста, кои отсуствуваа заради акумулација на жолти картони. Стрелци за „сините“ на денешниот дуел беа Педро, Азар од пенал и повторно Педро заокружувајќи го одличниот меч денеска.

Манчестер Јунајтед ја продолжи одличната серија во Премиер лигата и го победи Сандерленд со 3-1. „Црните мачки“ денес гостуваа на „Олд Трафорд“ предводени од поранешниот менаџер на домашната екипа, Дејвид Мојс. Радоста за домашната публика стигна пред полувремето, кога Ибрахимовиќ и Блинд одлично комбинираа на мал простор во противничкиот шеснаесетник, а Холанѓанецот со прецизен удар по земја го отвори резултатот. Точка на натпреварот ставија Златан Ибрахимовиќ и Хенрик Михтарјан, кои ја запечатија победата со два гола во завршницата. Швеѓанецот го постигна својот 12. сезонски погодок и се искачи на втората позиција на листата на стрелци зад Диего Коста (13).

Почесниот погодок за гостите го постигна Фабио Борини, кој со прекрасен удар од 20-ина метри го совлада Де Хеа за конечни 3-1. Со трите бода, Јунајтед остана на шестата позиција со 33 бода, а веќе оваа сабота повторно игра на домашен терен против Мидлсброу.

Арсенал се мачеше целиот натпревар да го скрши отпорот на ВБА. Победата за „топчиите“ ја донесе Оливие Жиру во самиот финиш од мечот, а значајни победи остварија и Вест Хем на гостувањето кај Свонси (1-4) и Барнли на домашен терен од 1-0 над Мидлсборо. Претходно во терминот од 13.30 часот Ватфорд и Кристл Палас одиграа само 1-1.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.