Стеауа се посрамоти со местење, претседателот Бекали им го уапси полицијата (видео)

Претседателот на романскиот првак Стеауа, Џиџи Бекали, синоќа е уапсен во Букурешт, по срамната фудбалска местенка во последното коло против Виторул Констанца.

Стеауа загуби на домашен терен, од тимот што се бореше за опстанок во првата романска лига, со 2-5, иако е многу посилен тим. Бекали се обиде да побегне во Израел, но беше уапсен од романската полиција и за него ќе има истрага за местење фудбалски натпревар.

Чудниот тек на натпреварот од последното коло го навестија обложилниците, со поставување „смешни“ коефициенти за победа на апсолутниот аутсајдер Виторул. За нив, иако гостуваа кај шампионот на Романија, кој има страшно добар состав, коефициентот за победа беше 2, а за Стеауа 3,20, што само по себе беше најава за чуден исход на мечот. И сомнежите се покажаа испрвани, па Виторул го декласира поранешниот европски првак со 5-2, и тоа на гостински терен. Врската е јасна бидејќи двајцата претседатели на клубовите се кумови.

Лошо за македонскиот фудбал е што во двата состави имаше наши фудбалери. Од 40. минута за Стеауа настапи репрезентативецот Даниел Георгиевски, кој влезе во игра при резултат 1-3. Во спротивниот табор играше Бобан Николов, кој дури и постигна гол за Виторул. Погодокот на Николов беше вистинско ремек-дело, последен по ред во голеадата во Букурешт, но, за жал, веројатно е постигнат на срамно наместен меч, што во понатамошна постапка ќе се обидат да го разоткријат истражните органи во Романија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.