Истече рокот за поднесување тужби до Управниот суд

Синоќа истече рокот за поднесување тужби до Управниот суд за одлуките на Државаната изборна комисија по приговорите поднесени од партиите за гласањето и сумирањето на резултатите од предвремените парламентрани избори на 11 декември.

СДСМ соопшти дека поднел четири тужби до Управниот суд кои се однесуваат на гласањето во избирачки места во изборната единица 6. Движењето Беса, пак, објави дека нема да поднесе тужби до Управниот суд на одлуките на ДИК да отфрли седум од осумте нивни приговори за изборниот процес.

ВМРО-ДПМНЕ како предводник на коалицијата „За подобра Македонија“ информираше дека до Управниот суд поднеселе тужба против решението на ДИК со кое се уважи приговорот на Движењето БЕСА и се поништија изборните резултати на гласачкото место бр. 0396/1, во општина Гостивар.

ДИК прифати само еден приговор од Беса и поништи гласање на едно избирачко место во Гостивар, а ги отфрли шесте приговори поднесени од Коалицијата предводена од СДСМ.

Решението за поништеното гласање во гласачкото место во Гостивар, според заклучокот на ДИК, треба да биде доставено и до партиите и коалициите учесници на изборите во Изборната единица 6, кои исто така ќе можат да ја обжалат одлуката до Управниот суд.

Судот, пак, има рок од 48 часа по примањето на тужбите да одлучува по нив. Одлуката треба во рок од 24 часа треба да ја објави на својата веб-страница.

По тужбите Управниот суд одлучува во совет од петмина судии избрани по пат на ждрепка, на јавна седница за која ја информира јавноста и овластените претставници по чии тужби се одлучува. Објавените одлуки на веб-страницата на ДИК, како што е наведено во Роковникот на Комисијата, ќе го содржат и начинот на гласање на секој судија поединечно.

Седницата на ДИК за приговорите траеше три дена, со што беа пробиени роковите предвидени во Роковникот за изборите. Според тоа, се пролонгира и рокот за конечните резултати. Тоа ќе се случи откако ќе бидат познати одлуките на Управниот суд, и доколку нема прегласување на некое избирачко место. Доколку има прегласување, тоа треба да се одржи на 25 декември.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.