Иванов: Ќе го доделам мандатот на партијата што има мнозинство во Собранието

Претседателот на Република Македонија, Ѓорге Иванов, им честита на граѓаните на Република Македонија и изразува задоволство од спроведените предвремени парламентарни избори на 11 декември. Со овие избори, додава Иванов, Република Македонија исполни еден од клучните услови на кои се обврзаа лидерите со Пржинскиот договор. Очекувам, додава македонскиот претседател, како што Република Македонија уште еднаш покажа исполнителност, Европската Унија да покаже доследност и принципиелност кон нас, да изнајде начин и да овозможи напредок на Република Македонија на евроинтеграцискиот пат.

интегрален текст

Почитувани граѓани на Република Македонија,

Сакам да изразам задоволство од спроведените предвремени парламентарни избори на 11 декември.

Пред сè, им честитам на граѓаните, што покажаа одговорност и излегоа во масовен број да го остварат своето право на глас.

Годинава, кога одбележуваме 25 години од нашата независност, покажавме демократска зрелост и го потврдивме нашиот капацитет за спроведување на фер, слободни, мирни и демократски избори.

Сакам да им честитам на партиите што освоија најголем број гласови на овие избори – на победниците, и да им честитам на сите партии кои беа вклучени во изборниот процес.

Очекувам сите кои се натпреваруваа во изборната трка да ги поздрават изборните резултати. Во демократска атмосфера, едногласно да биде поздравена и признаена волјата на граѓаните. Не смееме да дозволиме да не се почитува волјата на граѓаните и да се создаваат услови за нови кризи.

Релевантните домашни и меѓународни институции потврдија дека Република Македонија спроведе избори кои доликуваат на една европска и демократска држава.

Им честитам на сите институции кои одговорно ја завршија својата работа и овозможија регуларност и кредибилитет на изборите.

Почитувани граѓани на Република Македонија,

Во согласност со Уставот, законските процедури и временските рокови, по конституирањето на Собранието на Република Македонија, ќе го доделам мандатот на партијата што има мнозинство во Собранието. Потоа, очекувам во најбрзо време да се формира и новата Влада на Република Македонија.

Со овие избори, Република Македонија исполни еден од клучните услови на кои се обврзаа лидерите со Пржинскиот договор.

Очекувам, како што Република Македонија уште еднаш покажа исполнителност, Европската Унија да покаже доследност и принципиелност кон нас.

Ја повикувам Европската Унија да изнајде начин и да овозможи напредок на Република Македонија на евроинтеграцискиот пат.

Како што сметав дека Република Македонија има капацитет да ги одржи овие значајни избори онака како што поминаа, верувам дека овие избори ќе придонесат за крај на политичката криза и ќе претставуваат почеток на национално помирување во Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.