Дуелот меѓу Вестбрук и Харден заврши со победа на „брадата“ (видео)

Мечот на вечерта во НБА лигата беше дуелот меѓу Оклахома и Хјустон, односно мегданот меѓу Расел Вестбрук и Џејмс Харден.

Иако неверојатниот Вестбрук го запиша седмиот трипл-дабл, со што се израмни со Мајкл Џордан од 1989 година, гостите на крајот стигнаа до триумфот од 99-102. На неговиот ривал од спротивната страна му недостасуваше само еден скок за трипл-дабл, но затоа замина со победата. Вестбрук го заврши дуелот со 27 поени, и по 10 скока и асистенции, додека Харден имаше 21 поен, 9 скока и 12 асистенции.

Леброн Џејмс и Кливленд немаа милост кон неговиот поранешен клуб, победувајќи го Мајами со 114-84. Леброн со синоќешните 27 поени се запиша во историјата како деветти најдобар стрелец во НБА. Со вкупно 27.315 поени го прескокна легендарниот Хејз и сега му се потребни само 94 поени да го престигне и Мозес Малоун.

Кошаркарите на Милвоки загубија од Атланта на свој терен со 114-110. Милвоки го запиша десеттиот сезонски пораз, иако на полувреме имаа предност од дури 20 поени (64-44). Во второто полувреме следеше комплетен распад, па Атланта стигна до втората едноподруго победа. До триумфот ги предводеше Денис Шродер со 33 поени и четири асистенции, а Пол Милсап постигна 23 поени, дополнете и со 14 скока и шест асистенции. Кај домашните најдобар беше Паркер со 27 поени.

НБА резултати:

Шарлот – Орландо 109-88, Бостон – Торонто 94-101, Кливленд – Мајами 114-84, Милвоки – Атланта 110-114, Минесота – Детроит 90-117, Оклахома – Хјустон 99-102, Далас – Индијана 111-103, ЛА Лејкерс – Феникс 115-119, Сакраменто – Њујорк 100-103

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.