Речиси 300 лица со овчи сипаници се регистрирани за два месеца во Центарот за јавно здравје Кавадарци. Како што информираше денеска Ристе Јовановски, специјалист епидемиолог, меѓу овие 300 лица не се оние кои заболеле во Кавадарци и Росоман и се лекуваат во домашни услови.
– Во октомври се евидентирани 140, а во ноември 138 пациенти со варичела. Ова е есенско зимски период кога вообичаено се појавуваат овчите сипаници, најчесто контактно по воздушно капков пат. Затоа бројките се очекувани, а тие варираат од ден на ден. Ситуацијата сепак не е се уште алармантна како во 2013 година, кога беше прогласена епидемија, а имаше околу 600 заболени за два три месеци, рече Јовановски.
Варичелата е најчесто присутна кај деца од претшколска и школска возраст. Јовановски препорачува заболените да се изолираат во домашни услови. Кај посериозните случаи, да се зема соодветна терапија по препорака од лекар.
– Ситуацијата се уште не е толку сериозна за да може да се прогласи епидемија. Ќе следиме како се движат бројките, па ќе реагираме соодветно, додаде Јовановски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
