Ристовски: Со засадување дрвја помагаме за целокупната еколошка слика на нашата држава

Спиро Ристовски заменик-министерот за образивание и наука смета дека со засадувањето на дрвја помагаме за целокупната еколошка слика на државата. Тој денеска ја посети општина Кавадарци и засади дрвце во месноста „Глишички рид”.

Ристовски изрази задоволство што во акцијата се вклучени и сите образовни институции, а се со единствена цел, развој на еколошката свест.

-На тој начин придонесуваме за правилниот еколошки развој на Република Македонија, за подобрување на состојбата со квалитетот на воздухот и целокупната еколошка слика на нашата држава. Истовремено тоа значи и правилно развивање на еколошката свест пред се кај учениците, што на долг рок значи развој на Република Македонија на ова поле, рече Ристовски оценувајќи ја акцијата како една од клучните за иднината на нашата држава.

Кавадаречкиот градоначалник Александар Панов информира дека поради големата снежна покривка на првично планираната локација, се одлучи да се пошумува на „Глишички рид”.

-Позади нас можете да ги забележите и ефектите од оваа акција која се реализираше во текот на минатите години. Ова е една од критичните точки за Кавадарци, покрај долот „Калница”, кој ни прави штети. Ова е вистинското место за уредување, спречување на ерозија и екологија, нагласи Панов.

Во рамките на денешната акција за пошумување на голините „Ден на дрвото”, во Кавадарци и Росоман е планирано да се пошумат триесет хектари површина. Како што информираше директорот на подружницата на Македонски шуми, „Бор” од Кавадарци, Слободан Климовски, на располагање се 75 илјади садници јавор, јасен, багрем и чемпрес.

Во Росоман, се пошумува во росоманското село Мрзен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.