Лош ден за фаворитите, Клиперс, Сан Антонио, Кливленд доживеаја порази (видео)

Синоќешните натпревари во рамките од НБА-лигата донесоа тотално неочекувани резултати, откако Кливленд, Сан Антонио и Лос Анџелес клиперс претрпеа порази на дуелите на кои важеа за апсолутни фаворити. Шампионот Кливленд „настрада“ во Милвоки, каде „Леброн и компанија“ загубија со убелдиви 118-101 од бакси. Играњето против актуелниот првак најмногу го мотивираше Јанис Антетокунпо, па грчкиот репрезентативец го одигра својот најдобар меч сезонава, реализирајќи 34 поени, 12 скокови и 5 асистенции. Кај Кливленд најефикасен беше Леброн Џејмс со 22 поени (но и со седум загубени топки), пред Ирвинг со 20 и Кевин Лав со дабл-дабл од 13 поени и 13 скокови.

Сан Антонио се наврати на разочарувачките натпревари на домашен терен, овојпат губејќи пред своите гледачи од Орландо меџик со 83-95. „Магичните“ ја прекинаа серијата од 10 порази во низа од „мамузите“, пред се поради неорганизираната игра на домашниот тим кој имаше 19 загубени топки, најмногу сезонава. Серж Ибака беше најефикасен кај Орланд со 18 поени, кај Сан Антонио прв стрелец беше Леонард со 21, но целосно потфрлија стартните бекови, Тони Паркер и Дени Грин, кои заедно постигнаа вкупно четири поени со шут од поле 1/10.

Очајната вечер за фаворитите ја комплетираа кошаркарите на ЛА клиперс, кои по дополнителни десет минути загубија со 127-122 на гостувањето во Бруклин. Бруклин предводен од Шон Килпатрик се врати од 16 поени негатива во последната четвртина, па потоа во драматичен финиш го скрши отпорот на клиперси, кои по извонредниот старт паѓаат во сериозна резултатска криза. Килпатрик го заврши мечот со 38 поени и 14 скокови, Брук Лопез реализираше 27 поени, додека кај клиперси најефикасен беше Крис Пол, кој оствари трипл дабл од 26 поени, 10 скокови и 13 асистенции.

НБА резултати:

Шарлот – Детроит 89-112, Бруклин – ЛА клиперс 127-122 (по прод.), Милвоки – Кливленд 118-101, Њу Орлеанс – ЛА лејкерс 105-88, Сан Антонио – Орландо 83-95, Јута – Хјустон 120-101.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.