Шампионот потклекна во Индијана, Марк Гасол ги порази ЛА Клиперс (видео)

Синоќа во НБА лигата беа одиграни 11 натпревари. Најитересно беше Лос Анџелес каде домашните Клиперс беа поразени од Мемфис благодарејќи на феноменалниот Марк Гасол.

Шпанскиот репрезентативен центар кој поради повреда ја пропушти Олимпијадата во Рио, очигледно се враќа во посакуваната форма и ќе биде ударна игла за неговиот тим во понатамошниот дел од сезоната и обидот да стигнат до плејофот.

Лос Анџелес клиперс сосема неочекувано беше поразен од Мемфис гризлис, и тоа на домашен терен со резултат 107-111. Тимот од Лос Анџелес влезе во овој дуел со само еден пораз сезонава и беше на чекор да ја продолжи успешната серија, но Марк Гасол имаше поинакви планови. При резултат 107-106 за клиперси шпанскиот центар на Мемфис погоди тројка од аголот на 14 секунди до крајот, носејќи го својот тим во водство. Домаќините го промашија следниот шут, по што Мемфис со две прецизни слободни фрлања и дефинитивно стави точка на оваа средба. Гасол го заврши натпреварот со 26 поени, 6 скока и 6 асистенции, а најефикасен кај Мемфис беше Конли со 30 поени.

Неочекуван пораз претрпе и шампионот Кливленд, кој загуби на гостувањето против Индијана со убедливи 103-93. Пејсерси важат за една од најслабите екипи на „истокот“ сезонава, но овој тим синоќа собра сили и одигра квалитетни 48 минути, земајќи го скалпот на актуелниот првак. Џорџ оствари дабл-дабл од 21 поен и 11 скокови, Тиг имаше 20 поени и осум асистенции, додека кај Кливленд најефикасен беше Кевин Лав, кој реализираше 27 поени и 16 скокови при овој пораз.

Голден стејт во извонреден офанзивен натпревар триумфираше на гостувањето во Канада против Торонто со 121-127. Стеф Кари беше најефикасен со 35 поени, додека Кевин Дурант го заврши натпреварот со 30 поени и девет асистенции.

НБА резултати:

Индијана – Кливленд 103-93, Орландо – Њу Орлеанс 89-82, Филаделфија – Вашингтон 109-102, Атланта – Милвоки 107-100, Бостон – Далас 90-83, Њујорк – Детроит 105-102, Оклахома сити – Хјустон 105-103, Торонто – Голден стејт 121-127, Денвер – Феникс 120-104, Сакраменто – Сан Антонио 105-110, ЛА клиперс – Мемфис 107-111.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.