Повторно пораз, Македонија не можеше да излезе на крај со „црвената фурија“ (видео)

Македонската фудбалска репрезентација сруши уште еден неславен рекорд. Го доживеа и четвртиот пораз од истотолку натпревари на стартот на едни квалификации за големо натпреварување.

По поразите од Албанија, Израел и Италија во четврото коло на гостувањето во Гранада против Шпанија доживеа најубедлив пораз досега во квалификациите за Светското првенство од 4-0.

Сепак како и во досегашните натпревари избраниците на селекторот Игор Ангеловски не излегоа на терен со бело знаме и имаа свои шанси за постигнување на погодок, но последната пречка пред голот на „црвената фурија“ голманот Давид Де Хеа беше непремостлив.

Таков беше случајот и во петтата минута кога По ударот на Спировски, Дарко Велковски имаше „мртов“ зицер од пет метри, но голманог на Манчестер Јунајтед рефлексно интервенираше. Реакцијата на Шпанците беше ударот на Мората во 13. минута, но неколку метри крај голот. По вториот корнер, Пандев со глава биеше одлично, но топката заврши за малку крај дирекот. Шпанците на половина полувреме имаа голема можност да поведат, но по зицерот на Мората, Димитриевски одбрани, а потоа ударот на Силва, Велковски спаси чист гол. Три минути подоцна пак дуел на Мората и Димитриевски и пак одлична интервенција на кумановчанецот. Сепак во 34. минута по една навидум безопасна ситуација Велковски се судри со Ристовски и си постигна евтин автогол за 1-0 на полувреме.

Вториот дел почна со голема шанса за Силва за домаќините и за Алиоски кај гостите. Одлуката околу победникот падна во 61. минута кога по центаршутот на Монреал, фудбалерот на Севиља, Витоло со глава ја погоди мрежата на Димитриевски за 2-0. Најубавата прилика за гол нашиот национален тим во второто полувреме ја имаше преку Барди, кој во 70. минута од околу дваесетина метри одлично биеше но Де Хеа со рефлексна паради одбрани.

Во последните десет минути Македонија беше декласирана откако најправин Монреал во 84. минута зголеми на 3-0, а две минути подоцна Адуриз по прекрасна акција го постави конечниот резултат на мечот (4-0).

Од добар почеток Македонија дојде до убедлив пораз и со наведнати глави се враќа во Гранада.

All Goals & Highlights HD – Spain 4-0 FYR… by Foot_Videos

Во останатите натпревари Србија успеа да извлече бод на гостувањето кај Велс одигривајќи 1-1, Украина славеше минимална победа со 1-0 на домашен терен над Финска, а Италија беше убедлива против аутсајдерот Лихтенштајн и го торпедираше со 4-0. Албанија неможеше со двајца играчи помалку да извлече поволен резултат на домашен терен против Израел (0-3).

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.