Синоќа во НБА лигата на програмата беа дури 10 натпревари. Во источната конференција се одигра легендарното дерби меѓу Бостон и Чикаго, а на западот најитересен беше дуелот меѓу ЛА Клиперс и Оклахома.
Откако беше обелоденето на крајот од минатата сезона дека првата ѕвезда на Оклахома, Кевин Дурант го напушта тимот и се сели во Голден стејт, многумина предвидуваа дека токму еден од најдобрите тимови во лигата ќе доживее дебакл и ќе биде топовско месо за конкурентите. Сепак по само неколку натпревари од новата сезона така не мислат Расел Вестбрук и другарите бидејќи продолжуваат со одличните настапи.
Синоќа на тешкото гостување во Лос Анџелес против екипата на Клиперс забележаа уште една победа овојпат минимално со 85-83. Повторно во главна улога беше Расел Вестбрук, кој одигра одличен меч постигнувајќи 35 поени, меѓу нив и клучниот шут за победа на 18,7 секунди до крајот, за четврти триумф во низа на „грмотевиците“. ЛА клиперс погодија само еден шут од поле во последните пет минути, што беше клучно за домаќините да го загубат овој меч. Блејк Грифин не постигна ниту еден од своите 14 поени во четвртата четвртина. Крис Пол беше најзабележителен со 15 поени, 11 скока и 9 асистенции, но плејмејкер на клиперси имаше три загубени топки во последниот период.
Интересен тек имаше дербито во источката конференција бидејќи поранешната ѕвезда на Бостон Ражон Рондо се врати во градот каде ја започна импресивната кариера, но овојпат во дресот на Чикаго. Тој не беше во можност да и помогне на својата нова екипа и го претрпе првиот пораз оваа сезона од 107-100. Ајзеа Томас и Амир Џонсон со по 23 поени беа најефикасни во таборот на селтикси, додека кај Чикаго најдобар поединец беше Џими Батлер со 23 поени.
ЛА лејкерс забележаа изненадувачка победа на гостувањето против Атланта со 116-123. Лејкерси губеа во поголемиот дел од натпреварот, но направија пресврт благодарение на искусниот Лу Вилијамс, кој постигна 16 од своите 18 поени во четвртата четвртина и му ја донесе победата на својот тим.
НБА резултати:
Шарлот – Филаделфија 109-93, Вашингтон – Торонто 103-113, Бруклин – Детроит 109-101, Атланта – ЛА лејкерс 116-123, Њујорк – Хјустон 99-118, Бостон – Чикаго 107-100, Мемфис – Њу Орлеанс 89-83 (по прод.), Јута – Далас 97-81, Феникс – Портланд 118-115 (по прод.), ЛА клиперс – Оклахома сити 83-85.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
