Ирвинг го реши дербито со Торонто, Вестбрук со трипл-дабл (видео)

Кливленд славеше со 94-91 против Торонто во дербито на Истокот од синоќешните натпревари кои се играа во НБА лигата, стигнувајќи и до втората победа на стартот од сезоната.

Демар Дерозан на 90 секунди пред крајот на мечот со одлично забивање донесе израмнување за Торонто, но на спротивната страна Кајри Ирвинг беше прецизен во шутот за три одлучувајќи го овој дуел. Ирвинг беше и најефикасен кај гостите со 26 поени, дополнети со шест скока и шест асистенции, а Леброн Џејмс дополни со 21 поени, осум скока и седум асистенции. Кај домашните ДеРозан заврши со 32 постигнати поени.

Голден стејт по лошиот старт запиша победа над Њу Орлеанс, на гости славејќи со 114-122. Кевин Дурант мечот го заврши со 30 поени, 17 скока и шест асистенции, додека Клеј Томпсон и Стефан Кари постигнаа по 28, односно 23 поени. На домашните не им помогна ниту уште едно брилијантно издание на Ентони Дејвис кој постигна 45 поени, а имаше и 17 скока, три асистенции и две блокади.

Најинтересниот меч го одиграа Оклахома и Феникс. По продолжение славеше Оклахома со 113-110, благодарение на „трипл-дабл“ ефектот на Вестбрук кој стигна до 51 поен, 13 скока и 10 асистенции. Во редовите на Феникс подобар од останатите беше ТиЏеј Ворен со 30 поени и девет скока.

НБА резултати:

Торонто – Кливленд 91-94, Бруклин – Индијана 103-94, Оклахома – Феникс 113-110, Њу Орлеанс – Голден стејт 114-122, Детроит – Орландо 108-82, Мајами – Шарлот 91-97, Далас – Хјустон 98-106, Јута – ЛА Лејкерс 96-89

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.