На големата сцена во МНТ на 26 септември, ќе биде одиграна македонската премиера на претставата „Соларис“ во режија и адаптација на светски познатиот Андриј Жолдак.
Светската премиера на „Соларис“ беше на 10, 11 и 12 јуни во Виена, а сега ќе биде во Скопје.
Преттставата „Соларис“ е копродукциски проект помеѓу Македонски народен МНТ и фестивалот „Винер фествохен“.
Соларис“ е втора соработка на Жолдак со МНТ по премиерата на „Електра“ во 2014 година. Овој пат режисерот, кого го нарекуваат Мејерхолд на новото време, го поставува на сцена истоимениот филозофски и научнофантастичен роман на Станислав Лем.
Книгата на полскиот писател го инспирирала и режисерот Тарковски, кој ја екранизираше во 1972 година, а филм „Соларис“ направи и Содерберг 30 години подоцна.
Актерската екипа на „Соларис“ ја сочинуваат Дејан Лилиќ, Дарја Ризова, Александар Ѓорѓиоски, Славиша Каевски, Драгана Левенска, Александар Михајловски, Софиа Насевска –Трифуновска, Арна Шијак, Калина Трипкова, Дарио Ефтимовски и Христијан Денковски.
Сценографијата е на Жолдак и на Моника Пормале, костимограф е Даниел Жолдак, асистент на режија е Никола Кимовски, а музиката е на Владимир Кликов.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
