Стратегот на МЗТ Скопје, Емил Рајковиќ, со право беше задоволен од изданието на своите избраници на дуелот против Фени индустри. Победата од 33 поени разлика, во која Рајковиќ имаше и можност да им даде заслужен одмор на дел од членовите на стартната петорка на „металците“ беше демонстрација на моќта на домашната сцена, но на Рајковиќ му е јасно дека вистинските предизвици допрва следат, како во АБА-лигата, така и во Еврокупот.
– Заслужено победивме, одигравме квалитетен натпревар во кој имав можност да ги видам на дело речиси сите кошаркари. Немавме премногу време за заеднички тренинзи и токму поради тоа морам да бидам задоволен, пред се од залагањето во одбраната, која ни функционираше одлично. На физички план сме многу блиску до 100%, но кога станува збор за тактичката подготвеност знам дека можеме многу подобро. Секој нов тренинг се повеќе напредуваме, играчите се навикнуваат еден на друг и очекувам формата да ни се движи во нагорна линија – изјави Рајковиќ по денешната победа.
Триумфот за жал беше платен со повредата на Ѓорѓе Дреновац, кој се пожали на болка во мускулот во првото полувреме и потоа не се врати на теренот.
– Утре наутро Дреновац ќе замине на детални прегледи, по што ќе биде јасно за каква повреда станува збор. Се надевам дека не е ништо сериозно бидејќи станува збор за значаен играч во нашата ротација – истакна тренерот на „металците“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
