Лидерите на ВМРО-ДПМНЕ, на СДСМ, на ДУИ и на ДПА, согласно политичкиот договор постигнат на 20 јули годинава, денеска треба да одржат средба на која ќе оценат дали се исполнети условите за одржување фер и демократски избори.
Доколку лидерите на четирите најголеми политички партии се договорат, изборите треба да се одржат на 11 декември, а на 100 дена пред изборите треба да се избере преодна влада во која ќе партиципира опозицијата.
Во преодната влада опозицијата треба да ги добие министерските места во секторите внатрешни работи и труд и социјална политика, како и дополнителни заменици министри за финансии, информатичко општество и администрација и за земјоделство. На 100 дена пред изборите опозицијата треба да именува нов главен и одговорен уредник на МРТВ, а денеска се очекува да биде комплетирано и ад-хок телото кое ќе ги мониторира медиумите.
Претходно, беше прочистен Избирачкиот список од гласачи кои имаа спорни записи.
На средбата се очекува да присуствуваат и претставници на меѓународната заедница, американскиот амбасадор Џес Бејли и висок претставник од делегацијата на ЕУ, како посредници во постигнувањето на Пржинскиот договор.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
