Меѓународниот кривичен суд (ICC) од Хаг го обвинува исламистот-џихадист Ахмад ал Факи ал Махди, од Мали за уништувањето на Тимбукту, вреден објект на исламската култура кој е ставен под заштита на УНЕСКО и претставува светско културно наследство.
Џихадистичката група Ансар Дине, поврзана со терористичката мрежа на Ал Каеда, во април 2012 година, разурна девет светилишта и една џамија во Тимбукту, прогласувајќи ги сите како пример за „идолатрија“.
Судскиот процес против Махди, што се отвора денеска, во судот во Хаг, е првиот случај кога уништувањето на културно наследство се третира како воено злосторство. Ова е и прв случај кога еден исламист-џихадист е обвинет и изведен на судење пред Судот.
За тој случај, Судот има обезбедено деветмина сведоци кои биле присутни на уништувањето.
Хуманитарните групи оценуваат дека нивното присуство не само што претставува доказ за уништуањето на еден исклучителен културен локалитет, туку помага да се покаже дека уништување на објекти кои се третираат како значајно културно наследство, не е само физичко повредување на еден објект, туку и повреда на социјалната, културната и историската структура на една верска и етничка заедница.
Групата Ансар Дине, чии членови се припадници на етничката група Туарези во Западна Африка, го освои и го држеше под контрола градот Тимбукту, неколку месеци. Осомничениот Махди (40) е поранешен учител кој во џихадистичката група бил задолжен за доследна примена на шеријатското, исламистичко право.
Тимбукту претставува центар на исламското учење од 13 до 17 век и има одиграно важна улога во ширењето на исламот во регионот на Западна Африка. На листата на УНЕСКО, градот и неговите светилишта се ставени во 1988 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
