Европскиот шампион Германија триумфално го заврши натпреварувањето по групи олимпискиот турнир во ракомет во Рио и се пласираше на првото место во групата Б откако попладнево славеше над селекцијаа на Египет со резултат 31-25. Со овој триумф европските шампиони им направија огромна услуга на Полјаците, кои благодарение на поразот на Египет останаа на четвртата позиција и ќе ги продолжат настапите во Рио де Жанеиро.
„Панцерите“ водеа во текот на целиот натпревар и заслужено триумфираа, а најзабележителни во нивните редови беа Генсхајмер со седум и Хефнер и Рајхман со по шест погодоци.
Полска во првиот натпревар на денешната програма загуби од Словенија со резултат 20-25, но и покрај поразот Полјаците го освоија четвртото место и се пласираа меѓу осумте најдобри селекции на овие Олимписки Игри. По израмнетите 13-13 во првото полувреме, клучно беше влегувањето во игра на словенечкиот голман Шкоф, кој за 30 минути имаше девет успешни интервенции и го трасираше патот до нова победа на селекцијата предводена од Веселин Вујовиќ.
Полска се уште е без Михал Јурецки, кој се повреди на третиот натпревар против Египет, во негово отсуство прв стрелец беше Бјелецки со четири гола, додека „прва виолина“ кај Словенците беше Зарабец со седум постигнати погодоци.
Дерби дуелот од петтото коло во групата А го одиграа вечните ривали, Франција и Данска. Актуелниот олимписки шампион селекцијата на „триколорите“ беа преголем залак за Микел Ханесен и другарите и заслужено славеше со 33-30. Иако натпреварот се одигра без резултатски императив ракометарите на двете репрезентации прикажаа одлична игра со многу голови.
Квентин Маје со 9, Даниел Нарцис со 8 и Валентин Порт со 7 гола беа најефикасни кај Французите. Кај данската репрезентација Микел Хансен се истакна со 8, а Ласе Сван се надоврза со 6 погодоци.
Со евентуална победа на Хрватска во последниот дуел над Тунис, токму „каубоите“ бидат тие што ќе ја завршат групата на првото место, бидејќи иако ќе се изедначат со Франција по бројот на бодови, сепак победата што ја остварија избраниците на селекторот Бабиќ е пресудна за изгледот на табелата во групата А.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
