Враќањето на довербата во избирачкиот список и во избирачкиот процес е главната работа на која е ставен фокусот по оваа речиси двегодишна политичка криза, иако уривањето на довербата во списокот се гради долго, со сите божемни причини за губење на изборите од сè уште актуелната опозиција. Дали низ овој процес на чистење на списокот, со две, да ги наречам, генерални проби за избори, во април и потоа во јуни годинава, сега, конечно, може да се врати довербата, откако беше нарушена низ овој процес?
– Дали имаме или немаме доверба, на Балканот може да се спореди со тоа дали имаме доверба во сопругата или не. Тоа е внатрешно чувство на сите што живееме тука и кои понекогаш немаме доверба во ништо и во никого. Тоа се случува и со избирачкиот список, кој е оспоруван од сите актерите што учествуваа и загубиле во изборните процеси уште од почетокот на 90-тите години, кога за првпат организиравме парламентарни избори, па сè досега. Но, кога ќе победат, тогаш различно толкуваат и имаат доверба. Ние мора да го смениме менталитетот и да почнеме да им веруваме на институциите на државата, кои ние ги создадовме и во кои се вклучени лица што професионално си ја вршат работата.
Една од тие институции кон која е свртен фокусот е ДИК, во која има членови од политичките партии. Повторно, партиите, чиишто членови се дел од ДИК, па и ја раководат, опозицијата, создаваат, како што велите, чувство за недоверба кон избирачкиот список. Тука ќе ги споменам половината милион фантомски гласачи, па 300.000, па 200.000, па 350.000, па на крај сè сведе на 39.502 гласачи што треба да направат активна регистрација.
– Јас сакам да елаборирам како се создава овој документ. Ова е важен документ и ние како ДИК сме во корелација со МВР, кое води регистар на државјаните на Република Македонија, издава лични карти и патни исправи за тие граѓани и доделува живеалишта на граѓаните. Од тука ги црпиме сите податоци за да направиме избирачки список со граѓани што ги исполнуваат условите за да бидат во тој список. Тие услови се определени со Устав и со закон: ако е граѓанин на Република Македонија, со навршени 18 години и има валидна лична карта или патна исправа, има право да биде на избирачки список. Ова е гарантирано право на глас на секој граѓанин со меѓународни правни акти. Од крајот на 2015 година новиот состав на ДИК е компониран со тројца стручњаци, кои ја предводат Комисијата, потоа со тројца членови од позицијата и со тројца од опозицијата, со цел да се создаде доверба во избирачкиот список. Тројцата стручњаци се најкомпетентни за да се создаде доверба, а, исто така, и членовите од партиите се првенствено професионалци, а потоа партиски претставници. Веќе осум месеци се работи на оваа проблематика, со методологија за која дадоа согласност сите четири политички партии. Исто така, ДИК за да ја врати довербата склучи и меморандум за соработка со ИФЕС – Интернационална организација за изборното право. Имавме и меѓународен стручњак за обработка на податоците за спроведување на методологијата и неговата работа е многу значајна за резултатите. Дојдовме во една состојба во која, откако беше усвоен извештајот со мнозинство во ДИК, од опозицијата повторно немаше доверба во ваквиот избирачки список. Четирите партии со анекс на Договорот од Пржино направија 39.502 гласачи уште еднаш да се проверат, да можат да се пријават во рок од 25 дена, односно до 19 август и да ја докажат вистинитоста на податоците. Ако не се пријават, нема да бидат на избирачкиот список на овие избори. Но, кога ќе биде јавниот увид пред изборите, има уште еден рок од 15 дена, кога овие граѓани ќе може повторно да се пријават и да бидат вклучени во избирачкиот список.
„Избори како во Шведска“
-Мислам дека сега, со овие измени на законите, не само на изборниот законик, со формирање тела што ќе бидат многу професионални, со поголема обука и на полицијата, обуки на избирачките одбори и на општинските изборни комисии, а знаеме колку се овие избори значајни за Република Македонија, ако сите работат на задачите што им се дадени, секоја институција и политичка партија, кои се актери што влијаат на процесот, ние ќе успееме да спроведеме фер и демократски и веродостојни избори. Ние сме таков менталитет, кога го сакаме тоа, го правиме подобро и од скандинавските земји, а кога не сакаме, се споредуваме со најнеразвиените држави. А не дека не можеме, ова општество има капацитет, и зрели сме за тоа.
Во овие две „генерални проби“ на изборите, одложувани со политичка одлука, дојдовте до една ситуација во која место да се намали, избирачкиот список се зголеми, во согласност со бројот на државјанства и полнолетни граѓани. Се појави еден список со „фантоми“ што треба да се проверуваат, а сега повторно дојдовме до таа бројка од 39.502 гласачи, кои треба да се пријават. Па како дојде до тоа на таа „фантомска листа“ да се најдат, на пример, професорката Најчевска, сестрата на Шекеринска, Гордан Георгиев, Павле Трајанов? Што недостигало?
– Методологијата за проверка беше избирачкиот список да се вкрсти со базата на податоци на 10 институции, кои водат регистар на граѓани – катастар, здравствено или пензиско осигурување или други институции што водат вакви податоци за да може да видиме колку се преклопуваат. ДИК со меѓународните стручњаци од ИФЕС создаде и усвои 32 прашања како да се проверат граѓаните. Некои од прашањата, можеби, беа нелогични, но ги прифативме за да може да го исцрпиме прашањето дали во Македонија постојат фантомски гласачи. Така, на тие стручњаци им дозволивме да бидат вклучени прашања, на пример, ако во една куќа живеат повеќе од 20 членови да бидат проверени сите, без разлика дали имаат документи. Или ако во еден стан има повеќе од осум членови. Потоа, ако во една куќа има повеќе од 10 членови, или во стан повеќе од шестмина, а во семејството имаат различни презимиња. Имаше различни прашања со кои би можеле да најдеме и дали, на пример, луѓето живеат или не во наведена зграда, или зграда што, можеби, и не постои. Во целиот процес најдовме недостатоци на обработката на податоците во системот на урбанистичко планирање, уште има проблеми со имињата на улиците, со промените што се прават и други проблеми. И сега се мисли дека се „фантоми“сите тие што произлегоа од тој процес поради некој пропуст од овој тип. Тоа е една нелогична и брза интерпретација од разни стручњаци и аналитичари што дебатираат, а кои не ја знаат добро оваа проблематика. Сега излезе дека луѓето што имаат неточни податоци во самите регистри се „фантомски гласачи“. Мислам дека полека ќе дојдеме до една реалност. ДИК во 2013 година исклучи повеќе од 120.000 гласачи од избирачкиот список што немале валидна лична карта или патна исправа. Никој не се жалеше, а многу „експерти“ и тогаш велеа дека ДИК врши „неуставна одлука“ со тоа што не ги запишал овие избирачи. Законот за тоа кој може да биде впишан во избирачкиот список е јасен. Ќе повторам, медиумите, различни аналитичари што не ја разбираат тематиката и политички актери придонесуваа да нема доверба во избирачкиот список. Мислам дека сега веќе се разјаснети многу работи, ДИК веќе осум месеци работи јавно и транспарентно, со вклучени меѓународни стручњаци. Сега јавно ги повикуваме сега сите претставници на амбасади што се заинтересирани, потоа ОБСЕ/ОДИХР и други да се запознаат со проблематиката што ја имаме во Република Македонија. Јас ги повикувам и тројцата наши стручњаци од ДИК, претседателот и неговите заменици, да бидат повклучени во овој процес и во медиумите, за да може да се врати довербата во Избирачкиот список.
И „Република“ го поканува претседателот на ДИК, стручњакот Чичаковски, да дојде на интервју, иако досега не прифати ниедна наша покана. Чичаковски е од редовите на СДСМ и воедно е стручњак што ја води ДИК. Стручњакот, пак, кој во владата за спроведување избори седна како министер на МВР, Оливер Спасовски од СДСМ, побара да бидат избришани 138.000 гласачи, па вие го одбивте и писмено му го објаснивте законот. Тоа ли се стручњаците и такво ли е нивното однесување во ДИК?
– Ние не можеме да работиме со бројки што ги даваат министер или институција, ние бројките ги обработуваме во согласност со Изборниот законик. Таму не стои дека секој гласач треба да го проверуваме дали му е валидна личната карта, пасошот или дали му е тоа живеалиштето, или по која основа ги здобил. Тоа е во надлежност на МВР. Тоа што наведуваше министерот, тој може да каже така, но не го толкува изборниот законик, каде што работата е јасна, треба да се има еден од документите за да може гласачот да биде вклучен во избирачкиот список. Ние како ДИК се фокусираме да ги интерпретираме одредбите од тој законик без оглед на тоа дали некој се согласува со нив или не, затоа постои и гласање со мнозинство.
Во мај ги повикавте Милев и Дума од СДСМ, како и Чичаковски, откако не го потпишаа завршниот извештај, да достават забелешки и докази за некаква аномалија на избирачкиот список. Доставија ли таков доказ?
– Не, знаете, нашите седници се јавни, нѐ следат медиумите, јавноста, со цел создавање доверба, но ние некогаш си правиме и штета, кога дебатираме за нешто што е уредено. Тоа е нивно право, да не го прифатат или да го оспорат извештајот, но ДИК законски работи со мнозинство. Податоците во Избирачкиот список се точни и нема нерегуларности. Сега се докажува дека се точни.
Што се измени од мај досега за сега тие тројцата да го прифатат завршниот извештај?
– Па ова сега е договор меѓу четирите политички партии, тие, сигурно, анализирале.
Дали неприфаќањето на Чичаковски тогаш било резултат на партиско дејствување во ДИК или како стручњак?
– Јас не би можел да го тврдам тоа, интенцијата за овие 39.502 граѓани и 171.000 да се стават на посебен список беше токму на СДСМ. Ние имавме неколку заеднички средби на кои укажавме на состојбите и на крај произлегоа измените во Изборниот законик за да може ДИК да го спроведе тоа што е донесено со измените. Така, ДИК сега е во таа улога и на крај ќе излеземе со резултат, односно мислам дека и тие членови што беа против, сега ќе ја потврдат оваа реалност. Како се толкува политички, тоа е нивна работа.
Ова Ве прашав, за да се вратиме на довербата. Зад овој список треба да застанат сите.
– Ние сите треба да придонесеме за довербата. Јас сум предложен од ДУИ за во ДИК, но прво сум професионалец, а потоа политички претставник. Мојата политичка партија треба да верува во мене, во тоа што го кажувам и треба да стојам на таа вистина. Ако не ѝ се допаѓа вистината на партијата, таа нека најде друго алиби. Мислам дека веќе треба да се фокусираме на професионалноста и на тоа што е реално, без разлика на политичката припадност. Постои професорката Најчевска, не можам да кажам дека е „фантом“. Треба да престанеме да го употребуваме зборот „фантом“, тоа е навредливо. Знаете што е фантом? На непостојна личност да ѝ издадеш државјанство, па живеалиште, па лична карта, патна исправа. Кој би смеел, која институција би можела да прави такви нерегуларности? Мислам дека ова веќе е надминато и веќе никој не треба да споменува дека во Македонија постојат фантомски гласачи.
Да ги елаборираме и тие 171.000 луѓе, кои ќе бидат обележани со ѕвездичка, кои ќе треба да кажат каде ќе гласаат, во странство или во Република Македонија.
– Овие 171.000 луѓе, исто така, произлегоа од овие 32 прашања во методологијата. Тие гласачи не се најдени во неколку бази на податоци и се смета дека се надвор од земјава повеќе од три месеци. Партиите се договорија за посебен извод од избирачкиот список, за избирачкиот одбор да има поголемо внимание кон овие гласачи за да не се направи злоупотреба. Тие ќе имаат право да гласаат или надвор, или во Република Македонија. Но и оваа бројка не е реална, дека сите се надвор од Македонија. Познавам многумина што се тука, а кратко време биле надвор.
Ќе влијае ли овој посебен список на локалните избори?
– Не, бидејќи ова ќе важи само за овие избори, за да се врати довербата. Овие гласачи не се спорни, туку треба да има поголема проверка и внимание за да нема злоупотреба.
Досега имаше неколку измени на законот, имаше и обележување на прстите, а сега ќе има фотографии. Ќе има ли проблеми, на пример, околу фризурите?
– Сега имаме биометриски документи. Ова ќе важи за сите избори. Мислам дека нема да се појават многу проблеми. Ние сме разговарале, имаше во Косово проблеми, особено со жените што се фотографирани без шамии, а на изборниот ден не сакале да ја извадат шамијата. Но ние ќе го спроведеме ова за првпат и мислам дека нема да биде ефикасно, туку дека ќе помогне во тоа да не го оспоруваме процесот на гласањето и тој да помине без никаква дамка. Сега треба да мислиме позитивно и да помогнеме во процесот. Се работи за државата, за сите граѓани, кои не се виновни за нерегуларности, а тие што прават нерегуларности, да бидат казнети.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Поврзани вести
-
Дерковски: Едно гласачко место е поништено бидејќи резултатот намерно бил променет
-
ДИК: Со последните обработени податоци 91,4 отсто за, 5,64 отсто против
-
Нема проблеми при доставата и примопредавањето на гласачките материјали – ДИК ја одржа првата прес-конференција
-
ДИК апелира изборните органи да работат професионално и одговорно, набљудувачите да се придржуваат до Кодексот