Најдобрата македонска тенисерка Лина Ѓорческа продолжува со одличните настапи, обезбедувајќи финале на турнирот во Штутгарт што се игра за награден фонд од 25.000 долари.
Ѓорческа, која е трета носителка на овој турнир, попладнево во полуфиналната пресметка славеше над Германката Ана Заја со 2-0 во сетови. Заја во четвртфиналето ја совлада првата носителка Малечкова, но немаше сили за сличен подвиг против Ѓорческа, откако Македонката одигра извонредно и сосема заслужено се пласираше во ново финале. Нашата тенисерка го доби првиот сет со 6-4, а потоа полна со самодоверба заигра уште подобро во продолжението, триумфирајќи во вториот сет со убедливи 6-2.
Лина Ѓорческа за противник во финалето ќе ја има подобрата тенисерка од дуелот меѓу Пати Шнидер од Швајцарија и Далила Јакуповиќ од Словенија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
