Европскиот шампион на колена, заврши осумгодишната ера на „црвената фурија“ (видео)

Фудбалска Европа ќе добие нов шампион. Во седмото осминафинале на Европското првенство во Франција актуелниот владетел на Европа репрезентацијата на Шпанија беше комлетно надиграна од Италија и заслужено елиминирана.

Избраниците на Антонио Конте со концентрирана игра во текот на целиот меч заслужено славеа со 2-0 со головите на Џорџо Кјелини во 33. минута и Грацијано Пеле во самиот финиш од мечот.

Поројниот дожд уште од самиот почеток им создаде огромни проблеми на Шпанците, кои не успеаја да влезат во препознатливиот ритам против „пресингот“ на италијанскиот национален тим. На спротивната страна „аѕурите“ одлично го користеа просторот што им се отвараше, лесно создаваа шанси, па и заслужено дојдоа во водство. Де Геа најпрвин го одбрани ударот на Пеле на самиот почеток, но во 33. минута беше немоќен. Шпанскиот голман кратко ја одби топката по слободниот удар на Едер, но на одбиената топка натрча Кјелини и ја смести во мрежата.

Во продолжението од мечот Италија имаше уште две прекрасни шанси да постигне погодок, преку Едер и Џакерини, но сепак, Де Геа беше на висината на задачата. Шпанија, пак, најдобрата шанса на мечот ја имаше во Алваро Мората во 50 минута, но неговиот удар заврши во рацете на Буфон, а потоа во 89 минута се закани и Жерар Пике, но меѓу стативите повторно блескаше капитенот.

По неискористените шанси за „фуријата“ – дојде казната. Италија погоди за 2-0, во 90. минута, а стрелец беше Грацијано Пеле кој доби топка од Дармијан, се најде пред голот на Де Геа и не погреши.

За Италија ова е прв триумф над Шпанија од 2011 година и воедно слатка одмазда за поразот во финалето на ЕП 2012, кога „фуријата“ ги совлада „аѕурите“ со болни 4-0. Во четвртфиналето селекцијата на Италија ќе игра против Германија, а мечот ќе се игра на стадионот во Бордо.

Иако важеа за аутсајдери во овој натпревар сепак Италијанците си закажаа уште еден супер-дерби дуел овој пат против светскиот шампион Германија кој ќе се игра в сабота со почеток од 21 часот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.