Германската канцеларка Ангела Меркел изрази длабоко жалење поради одлуката на мнозинството Британци нивната држава да ја напушти Европската Унија и најави дека цел на Унијата ќе биде блиски односи во Лондон во иднина.
На прес-конференција посеветена на одлуката за напуштање на ЕУ, германската канцеларка рече дека Европа не треба да извлекува „брзи и едноставни заклучоци“ кои ќе создадат нови поделби во ЕУ, јави дописникот на МИА од Берлин.
– Сѐ до излегувањето од ЕУ Велика Британија ги има сите права и обврски како членка на Унијата. Нашата цел треба да биде да имаме блиски и кооперативни односи со Велика Британија во иднина – изјави Меркел во обраќањето кое беше пренесувано на телевизија. Според Меркел, Европската унија е доволно силна за да најде „вистински одговори“ за резултатите од референдумот во Велика Британија, а од Европејците побара никогаш да не заборават дека основањето на Европската унија е „идеја на мирот“.
Утринава Меркел се сретнала со лидерите на најголемите германски политички партии со кои разговарала за последиците од гласањето во Британија, а за в понеделник во Берлин ги покани францускиот претседател Франсоа Оланд, италијанскиот премиер Матео Ренци и претседателот на Европскиот совет Доналд Туск со кои ќе се разговара за идните чекори на ЕУ по референдумот во Велика Британија. Германскиот министер за надворешни работи Франк Валтер Штајнмаер за утре во Берлин закажал средба со неговите колеги од шесте земји основачи на ЕУ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
