Во Кокино ќе се промовираат најновите инфраструктурни реновации на локалитетот

Министерката за култура Елизабета Канческа-Милевска заедно со амбасадорот на САД Џес Бејли и директорката на Музејот на Куманово Анита Цветковска ќе ја посетат мегалитската опсерваторија Кокино каде што ќе ги промовираат најновите инфраструктурни реновации на локалитетот.

Реновацијата, како што е најавено, вклучува нови патокази, информативни табли, заштитна ограда за камените тронови на локалитетот, мобилна апликација за аудио водење и нова официјална веб страна на Кокино.

Проектот се спроведува за одржлив развој на Кокино како туристичка дестинација, како и за негова конзервација. Цел на проектот е локалитетот да стане лесно достапен за туристи, а притоа да се сочува неговиот автентичен изглед. Кокино привлекува меѓу 10.000 и 30.000 посетители годишно, што укажува на неговиот голем потенцијал како туристичка дестинација.

Проектот го спроведува Музејот на град Куманово во соработка со Локалната акциона група (ЛАГ) Абер 2015. Тој е финансиран од УСАИД и Владата на Швајцарија преку Проектот за експанзија на мали бизниси, како и идните развојни проекти на Министерството за култура.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.