Германија и Полска без голови, за Украина заврши ЕП (видео)

Без победник и без голови заврши вториот дуел во второто коло од групата Ц помеѓу Германија и Полска. Резултатот никако не има одговара на Украинците, кои дефинитивно се првата репрезентација која нема да избори пласман во следната фаза.

Фудбалерите на Германија и Полска денес на стадионот „Сан Дени“ одиграа без голови, имаше неколку добри шанси на двете страни, но сепак мрежите до самиот крај мируваа.

Првото полувреме не беше толку интересно, се играше најмногу по средината на теренот, а Полјаците се претставија како сосема достоен противник на светскиот шампион.

Во првите 45. минути немаше некоја посериозна шанса, посебно не после 20. минута.

Геце имаше шанса на самиот почеток по додавањето од Дракслер, но не шутираше прецизно кон голот на Фабијански. Десет минути подоцна нова шанса за Германците, Милер се избори за нов напад, а Крос шутираше, но само покрај голот.

До крајот на полувремето немаше никакви опасности на двете страни.

На самиот почеток од второто полувреме Полјаците се заканија. Гросицки упати центаршут од десната страна, Ноер веќе беше матиран, а Милик требаше само да постави нога или глава и да ја спроведе во мрежата. Се двоумеше, на крајот реши со глава но биеше само покрај голот, иако се чинеше дека потешко беше да промаши од таа ситуација.

Минута подоцна Геце на спротивната страна се најде сам пред Фабијански, но напаѓачот на Баерн Минхен биеше директно во полскиот голман, кому не му беше тешко да одбрани.

Милик имаше нов обид, овој пат од слободен удар, но повторно биеше покрај голот. Во 59. минута Левандовски се обиде да шутира од средината на шестнаесетникот, но Боатенг одлично реагираше и спречи сигурен погодок.

На другата страна нова шанса за Полјаците. Гросицки одлично се проби по левата страна, упати повратна топка на 11-те метри, таму беше Милик, кој се посрамоти во оваа ситуација откако ја промаши топката.

При крајот на натпреварот падна темпото на играта, на двете репрезентации им одговара нерешен резултат, а посебно на Полјаците кои во последното коло ќе играат против Украинците, кои ги изгубија сите шанси за пласман понатаму.

Табела (група Ц):
Германија 4 бода
Полска 4
Северна Ирска 3
Украина 0

Утре на програмата се:

Италија – Шведска 15:00ч.
Чешка – Хрватска 18:00ч.
Шпанија – Турција 21:00ч.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.