По посетата на рускиот претседател Владимир Путин на Грција, локалните медиуми денеска се осврнуваат на суштината и значењето на, како што ја нарекуваат, „историската посета“ на рускиот лидер.
Како што јави дописникот на МИА од Атина, една од поинтересните теории е дека уште со самото патување од Москва до Атина, Путин испратил пораки до повеќе примачи.
Нагласувајќи дека се работи за политичар кој е „искусен во меѓународните политички интриги и однесувања“, некои грчки медиуми пишуваат дека Путин испратил порака и со изборот на маршрутата на летот од Москва до Атина.
– Првиот лет од Москва до Атина не ја следеше вообичаената патека која вклучува и турски или подобро кажано, дел од турскиот воздушен простор, поради што и не бил доставен план за летање до Турција. Тој го заобиколил и летал над Македонија. Пораката, не само до Турција, туку и до САД и целиот Запад, е јасна – дека постои отворено прашање со Турција поради соборувањето на рускиот борбен авион пред неколку месеци и оти во одреден момент ќе има одмазда“, пишува еден од медиумите на Грците во Америка.
Според „Нешнл Хералд.гр“, Турците, од друга страна, „се однесувале глупаво со тоа што непосредно пред доаѓањето на Путин во Атина, турски воени авиони спровеле провокативни летови над островите во Егејското Море и уште еднаш го повредиле грчкиот воздушен простор“.
Медиумот потсетува дека авионите биле пресретнати од грчки авиони по што си заминале.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
