Турција осуди 74 лица на доживотен затвор поради вмешаност во обидот за преврат

Турски суд осуди денеска 74 лица, меѓу кои и војници, на доживотен затвор поради нивната улога во обидот за преврат во јули 2016 година.

Тие се осудени на строг доживотен затвор под обвинение за „обид за промена на уставниот ред“ и немаат право на амнестија.

Засега не е познато колку воени лица има меѓу групата осуденици.

Повеќе од 240 луѓе загинаа, а околу 2.200 беа повредени при обидот за пуч во Турција, а кој Анкара го обвинува исламистичкиот проповедник Фетулах Ѓулен и неговото движење, кое во Турција е наречено ФЕТО – Фетулахистичка терористичка организација.

По обидот за преврат турските власти спроведоа огромна чистка против наводни поддржувачи на Ѓулен, апсејќи околу 160.000 лица, меѓу кои универзитетски професори, воени и државни службеници. Од нив, според Министерството за внатрешни работи, 77.000 се официјално обвинети и ставени во притвор додека трае судскиот процес против нив.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.