Клинтон победи во Кентаки, а Сандерс во Орегон

Поранешниот американски државен секретар Хилари Клинтон победи на вчерашните прелиминарни избори за претседателски кандидат на Демократска партија во сојузната држава Кентаки, додека во Орегон победа извојува нејзиниот противкандидат, сенаторот од Вермонт, Берни Сандерс.

Како што јави Си-Ен-Ен, според преброени 99 отсто од гласачките ливчиња во јужната држава Кентаки, Клинтон освоила 46,7 отсто од гласовите, а Сандерс добил 46,3 проценти.

Според аналитичарите, ваквиот сооднос се очекува да се задржи и при пребројувањето на преостанатите гласови.

Од друга страна во Орегон, на северозапад од САД, според 60 отсто од преброените гласачки ливчиња, Сандерс освоил 52,7 проценти од гласовите, а Клинтон 47,3 отсто.

Победникот во Кентаки добива 60, додека тој во Орегон 74 делегати на Демократската национална конвенција, што ќе се одржи во јули во Филаделфија.

Пред вчерашното гласање, Клинтон имаше обезбедено 94 отсто од потребните 2.383 делегати, па и недостигаа уште 143 делегати за да ја осигура својата претседателска номинација.

Американските медиуми објавија дека врз Сандерс се вриши притисок да се откаже од натамошната изборна трка, во услови кога Доналд Трамп е речиси сигурен претседателски кандидат на републиканците.

Водствто на Демократската партија смета дека останувањето на Сандерс во траката и неговата остра реторика против Клинтон му користи само на Трамп, со што може да се влошат нејзините позиции во директната пресметка со кандидатот на Републиканската партија.

Меѓутоа, сенаторот од Вермонт, кој има настапувано на изборите и како независен кандидат и натаму вели дека останува во трката за претседателската номинација.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.