Отворањето на Фудбалската академија на ФК Вардар – нова страница во историјата на македонскиот фудбал! (ГАЛЕРИЈА)

Академијата ќе биде отворена свечено на 15 мај 2016, в недела, вo 13 часот. На отворањето ќе бидат присутни 1000 дечиња од Академијата и регионалните школи со своите родители. Објектот свечено ќе го отвори сопственикот на клубот Сергеј Самсоненко.

В недела ќе биде поставен и камен-темелникот на помошниот објект, кој ќе ја надополни Фудбалската академија. Тој ќе располага со продавница за сувенири на ФК Вардар, музеј за спортскиот клуб, кантина за релаксација на родителите и подземен паркинг. На локацијата е предвидено соодветно партерно решение со патеки, ознаки, осветлување итн. Осветувањето на објектот ќе го изврши поглаварот на МПЦ, г.г. Стефан, информираат од ФК Вардар.

Сите услови што ги нуди Академијата одговараат со високите стандарди на професионалните клубови од светски ранг. Академијата на ФК Вардар е подготвена за создавање на врвни фудбалери кои во иднина ќе ги гледаме во ФК Вардар, во репрезентацијата на Македонија или во некои големи европски клубови.

Фудбалската академија на ФК Вардар е еден од најсовремените спортски објекти наменет за работа со младите категори, кои се изградени не само на територијата на Република Македонија, туку и пошироко во регионот.
Како институција за развој на млади фудбалски таленти, работата на академијата е организирана според стандардите на познатите клубови од европската елита.

Тајните на фудбалската игра под водство на своите тренери и останатите стручни лицаќе ги изучуваат повеќе од 400 момчиња кои тренираат во подмладокот на најтрофејниот македонски клуб.

Со изградбата на овој капитален објект во Градскиот парк во Скопје, кој се протега на површина од 1.152 квадратни метри, младите вардарови надежи на располагање ги добијат фудбалско игралиште со вештачка трева, четири соблекувални за фудбалерите и две за тренерите, опремени со централна вентилација и подно греење, предавална за теоретска и спортска настава, канцеларии за администрацијата, економат и технички и помошни простории.