Јунајтед далеку од ЛШ, Вест Хем блиску до Лига на Европа (видео)

Екипата на Вест Хем вечерва на домашен терен го совлада Манчестер Јунајтед со 3-2 во заостанат натпревар во англиската Премиер лига.

Крајно неизвесен меч во Лондон, со два пресврта на водството, пет голови и победа на Вест Хем која „црвените ѓаволи“ ги одалечува од учество во Лигата на Шампиони следната сезона. На коло пред крајот Манчестер Јунајтед има два бода помалку од четвртопласираниот Сити и во последното коло потребна им е победа против Бормут, но и пораз на „граѓаните“ на гостувањето кај Свонси.

Вест Хем во првото полувреме поведе со голот на Сако во 10. минута, кој по додавањето од Ланзини одлично се снајде против тројца одбрамбени играчи на Јунајтед и го совлада Де Геа за водство од 1-0.

Енди Керол имаше одлична шанса да го зголеми водството, кога во една полуконтра се најде сам пред Де Геа, но шпанскиот голман одлично реагираше. До полувреме остана истиот резултат.

Лошата игра го натера Ван Гал да промени нешто, во вториот дел Керик го замени Шнајдерлин и гостинскиот тим заигра значително подобро. Веќе во 51. минута „црвените ѓаволи“ го израмнија резултатот. Мата одлично се проби по десната страна и го проигра Марсијал кој беше прецизен за 1-1.

Нов шок за домашната публика следуваше во 72. минута по одлично изведениот контра напад на Јунајтед. Вејн Руни ја одзема топката од противникот на средината од теренот и повлече брз контра напад, додаде до Рашфорд, кој одлично од прва го проигра Марсијал, а францускиот напаѓач по втор пат беше прецизен за пресврт од 1-2.

Но, водството на гостите траеше само 4 минути. Одбраната на Јунајтед повторно потфрли, Антонио остана сам на втората статива и со глава го совлада Де Геа за израмнување на резултатот.

Пет минути подоцна нов пресврт, Вест Хем повторно во водство откако одбраната на Јунајтед повторно катастрофално беше поставена и оставија сам играч на Вест Хем во нивниот шестнаесетник. Рид беше прецизен со глава за конечни 3-2 и важна победа на својот тим.

Манчестер Јунајтед остана на петтото место на табелата и само со теоретски шанси за ЛШ, додека Вест Хем сега е на шестата позиција, еден бод помалку од Јунајтед и со големи шанси за учество во Лига на Европа следната сезона.

Табела:
1. Лестер 80
2. Тотенхем 70
3. Арсенал 68
4. Манчестер Сити 65
5. Манчестер Јунајтед 63
6. Вест Хем 62
7. Саутемптон 60

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.