Кари се врати со 40 поени за нова победа на Голден Стејт, Мајами израмни на 2-2 (видео)

Синоќа во НБА лигата се одиграа четвртите натпревари од полуфиналните серии меѓу Голден Стејт и Портланд во западната конференција и Мајами и Торонто на истокот.
На двата меча мораа да се одиграат дополнителни пет минути по кои Голден Стејт поведе со 3-1, а Мајами израмни на 2-2.

По двонеделната пауза поради повреда, најдобриот кошаркар во НБА лигата, Стеф Кари се врати во тимот на Голден Стејт Вориорс и потсети зашто и оваа сезона ќе го добие МВП признанието.
Голден Стејт имаше 16 поени негатива на гостувањето кај Портланд во четвртиот натпревар од полуфиналната серија на Западот, но успеа некако да извлече продолженија и потоа да ја слави третата победа. Конечниот резултат е 132-125 и во петтиот натпревар на домашен терен Вориорс можат да ја завршат работата во оваа серија.

Прво име на мечот беше Стеф Кари кој заврши со 40 поени, а дури 17 од нив постигна во продолжението што е нов НБА рекорд. Освен тоа, тој оствари девет скока и осум асистенции и малку недостасуваше да дојде до првиот трипл-дабл во овогодишниот плеј оф. Ако Портланд победеше, прва ѕвезда ќе беше Демјан Лилард кој го заврши натпреварот со 36 поени иако имаше доста лош шут од поле – 9/30, но и десет асистенции. Мекалум заврши сок 24 поени, а Пламли оствари дабл дабл со 12 поени и 15 скока. Петттиот, можеби и последен, натпревар од серијата се игра утре во Окленд.

Мајами се врати од седум поени негатива на крајот од дуелот со Торонто, па со поените на Двејн Вејд мечот замина во продолженија, во кои „жешките“ доминираа и на крајот заслужено победија со 94-87. Вејд го заврши натпреварот со 30 поени, Драгиќ реализираше 15, вклучувајќи ја и клучната реализација „два плус еден“ со која стави крај на дилемите околу победникот на помалку од половина минута до крајот. Отсуството на Валанциунас (нема да се врати до крајот на оваа серија) остави силна трага врз играта на Торонто, а кога поради шест лични грешки во финишот од регуларниот дел од мечот од игра мораше да излезе и Лаури, стана јасно дека гостите од Канада нема да можат да ја забележат и втората победа во низа во Флорида.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.