Атлетико минимално, Реал се извлече, а Барса доминантно, Суарез со нова „четворка“ (видео)

Вечерва се одиграа пет натпревари во рамки на 35. коло во шпанската Примера Дивизија.

Барселона остана лидер на табелата по убедливата победа вечерва над Спортинг Хихон со 6-0, во натревар на кој на Каталонците им беа досудени дури три пенали.

Стрелци за Барса беа Меси во 12. минута, извонредниот Луис Суарез во 63., 73., 77. и 78. минута, како и Нејмар во 85. минута.

Барселона останува на првото место на табелата, а Суарез после вториот натпревар во низа како постигнува по четири гола сега е прв стрелец во Европа со 34 голови, три повеќе од Кристијано Роналдо.

Реал Мадрид успеа да го совлада Рајо Ваљекано со 3-2 по големиот пресврт на резултатот, но лоша вест за Зидан може да биде повредата на Карим Бензема.

Херој на натпреварот беше двојниот стрелец Герет Бејл, додека третиот гол го постигна Лукас Васкез кој во финишот на првото полувреме го замени повредениот Бензема.

Домашниот Рајо Ваљекано до 15. минута веќе имаше водство од 2-0. Најпрво Ибарба во 7. минута, а потоа Мику во 14. минута беа прецизни.

Реал очекувано тргна во офанзива. Во 35. минута Бејл по одличниот удар со глава го намали водството на дамаќините. Израмнувачкиот гол го постигна замената на повредениот Бензема, Лукас Васкез во 52. минута исто така со глава.

Во 81. минута Велшанецот повторно стапува на сцена, со одличен пробив си направи ситуација за шут и погоди во подалечниот агол на голот за голем пресврт и победа од 2-3.

И Атлетико Мадрид не се откажува од титулата, денес на домашниот „Висенте Калдерон“ минимално ја совладаа екипата на Малага.

Единствениот гол на натпреварот го постигна Анхело Кореа во 57. минута, кога од дваесетина метри извонредно шутираше и погоди за конечни 1-0.

Резултати:

Лас Палмас – Еспањол  4-0
Ваљекано – Реал Мадрид  2-3
Атлетико Мадрид – Малага  1-0
Барселона – Хихон  6-0
Еибар – Ла Коруња  1-1

Табела:

1. Барселона  82 бодови
2. Атлетико Мадрид  82
3. Реал Мадрид  81
4. Виљареал  60
5. Атлетик Билбао  54

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.